ఎలాంటి హడావుడి లేకుండా ఓటీటీలోకి అవారాపన్ 2.. ఎక్కడంటే?

కొన్ని సినిమాలు భారీ అంచనాలు లేకుండా థియేటర్లలోకి వచ్చి ఊహించని స్థాయిలో విజయాన్ని అందుకుంటాయి. ఇమ్రాన్ హష్మి నటించిన అవారాపన్ 2 కూడా అలాంటి చిత్రాల్లో ఒకటిగా నిలిచింది. 2007లో వచ్చిన అవారాపన్‌కు సీక్వెల్‌గా తెరకెక్కిన ఈ సినిమా ఆగస్టు 14న థియేటర్లలో విడుదలైంది. సుమారు రూ.45 కోట్ల బడ్జెట్‌తో రూపొందిన ఈ చిత్రం రూ.213 కోట్ల వరకు వసూళ్లు సాధించినట్లు సమాచారం. తాజాగా పెద్దగా ప్రచారం లేకుండానే అమెజాన్ ప్రైమ్ వీడియోలో రెంటల్ విధానంలోకి వచ్చేసింది. ప్రస్తుతం ఈ సినిమా హిందీలో మాత్రమే అందుబాటులో ఉంది. త్వరలో ఉచిత స్ట్రీమింగ్‌కు కూడా వచ్చే అవకాశం ఉంది.

అవారాపన్ 2 కథ విషయానికి వస్తే.. ఆలియా హమిద్ మరణం శివమ్ పండిట్‌ను తీవ్రంగా కలచివేస్తుంది. ఆమె పుట్టినరోజున నివాళులు అర్పించేందుకు సమాధి వద్దకు వెళ్లిన శివమ్‌కు అక్కడ ఓ పసికందు కనిపిస్తుంది. ఆ చిన్నారికి ఆలియా అని పేరు పెట్టి అనాథాశ్రమంలో చేర్పిస్తాడు. పదేళ్ల తర్వాత ఆలియాను ఓ జంట దత్తత తీసుకుంటుంది. అయితే గుర్తుతెలియని వ్యక్తులు ఆ దంపతులను హత్య చేసి చిన్నారిని కిడ్నాప్ చేస్తారు. ఆలియాతో పాటు మరికొందరు పిల్లలను బ్యాంకాక్‌కు తరలిస్తారు. అధికారికంగా ఆ గ్యాంగ్‌ను పట్టుకోవడం కష్టమని భావించిన ఇంటర్‌పోల్ అధికారి సమ్రత్.. శివమ్ సహాయం కోరతాడు. దీంతో ఆలియాను రక్షించేందుకు శివమ్ బ్యాంకాక్‌కి బయలుదేరుతాడు. అక్కడ అతడికి ఎదురైన పరిస్థితులు, చివరకు ఆలియాను కాపాడాడా లేదా అనేదే సినిమా కథ.