దానం తీర్పుతో ఫిరాయింపులపై బండి సంజయ్‌ ఫైర్‌

దానం నాగేందర్‌ అనర్హతపై సుప్రీంకోర్టు ఇచ్చిన తీర్పు కాంగ్రెస్‌, బీఆర్‌ఎస్‌ పార్టీల ఫిరాయింపుల రాజకీయాలకు గట్టి సందేశమని కేంద్ర మంత్రి బండి సంజయ్‌ అన్నారు. పార్టీ ఫిరాయింపులను ప్రోత్సహించే విధానాలపై కాంగ్రెస్‌, బీఆర్‌ఎస్‌ నేతలు ఆత్మపరిశీలన చేసుకోవాలని ఆయన వ్యాఖ్యానించారు. దానం నాగేందర్‌ దాఖలు చేసిన పిటిషన్‌ను సుప్రీంకోర్టు కొట్టివేసి, పార్టీ ఫిరాయింపుల నిబంధనల కింద ఆయనను అనర్హుడిగా ప్రకటిస్తూ తెలంగాణ హైకోర్టు ఇచ్చిన తీర్పును సమర్థించింది.

‘ఆయారాం.. గయారాం.. ఘర్‌ వాపసీ’ ఇదేనా రాజకీయ విధానమని బండి సంజయ్‌ ప్రశ్నించారు. అవకాశవాద రాజకీయాలను వీడి, పార్టీ ఫిరాయింపులను ప్రోత్సహించడం మానుకోవాలని కాంగ్రెస్‌, బీఆర్‌ఎస్‌ పార్టీలకు సూచించారు. ఖైరతాబాద్‌ ఉపఎన్నికలో పోటీ చేసే నైతిక అర్హత కాంగ్రెస్‌, బీఆర్‌ఎస్‌ పార్టీలకు లేదని ఆయన వ్యాఖ్యానించారు. దానం నాగేందర్‌ అనర్హతతో ఖైరతాబాద్‌ అసెంబ్లీ స్థానం ఖాళీగా మారినట్లు తెలంగాణ హైకోర్టు తన తీర్పులో పేర్కొంది.