ముక్కు సర్జరీ తర్వాతే నమ్మకం.. శ్రీదేవి గురించి జాన్వీ ఆసక్తికర వ్యాఖ్యలు!

దివంగత నటి శ్రీదేవి కుమార్తెగా సినీ పరిశ్రమలోకి అడుగుపెట్టిన జాన్వీ కపూర్.. హిందీతో పాటు దక్షిణాది చిత్రాల్లోనూ తనకంటూ ప్రత్యేక గుర్తింపు సంపాదించుకున్నారు. తెలుగులో ఎన్టీఆర్, రామ్ చరణ్ వంటి అగ్ర కథానాయకులతో కలిసి నటించి ప్రేక్షకులను ఆకట్టుకున్నారు. అయితే ఇటీవల ఏఐ దుర్వినియోగం కారణంగా పలు ఇబ్బందులు ఎదుర్కొన్న ఆమె ట్రోలింగ్‌కు కూడా గురయ్యారు. ఈ సమయంలో పలువురు సినీ ప్రముఖులు జాన్వీకి మద్దతుగా నిలిచారు. ఇటీవల ‘పెద్ది’ చిత్రంతో ప్రేక్షకుల ముందుకు వచ్చిన ఈ భామ.. ప్రస్తుతం కొత్త సినిమాలకు అంగీకరించకపోయినా, వరుస ఇంటర్వ్యూలతో వార్తల్లో నిలుస్తున్నారు.

ఈ క్రమంలో తాజాగా ఓ ఇంటర్వ్యూలో పాల్గొన్న జాన్వీ తన సినీ ప్రయాణం ప్రారంభంలో ఎదురైన అనుభవాలను పంచుకున్నారు. తాను నటిని కావాలనుకుంటున్నట్లు తల్లి శ్రీదేవికి చెప్పినప్పుడు ఆమె మొదట అభ్యంతరం వ్యక్తం చేశారని గుర్తుచేసుకున్నారు. సినీ రంగంలోకి రావాలంటే జీవితాన్ని పూర్తిగా నటనకే అంకితం చేయాలని శ్రీదేవి సూచించినట్లు తెలిపారు. తొలినాళ్లలో తనపై తల్లికి పెద్దగా నమ్మకం ఉండేది కాదని, ముక్కుకు శస్త్రచికిత్స చేయించుకున్న తర్వాత తన నిర్ణయంపై శ్రీదేవికి నమ్మకం కలిగిందని జాన్వీ వెల్లడించారు. ఆ మార్పు తర్వాతే నటిగా రాణించగల లక్షణాలు తనలో ఉన్నాయని తల్లి గుర్తించినట్లు ఆమె చెప్పుకొచ్చారు. ప్రస్తుతం జాన్వీ చేసిన వ్యాఖ్యలు సినీ వర్గాల్లో చర్చనీయాంశంగా మారాయి.