ఖైరతాబాద్ ఉప ఎన్నికపై విజయారెడ్డి పిటిషన్..

ఖైరతాబాద్ అసెంబ్లీ నియోజకవర్గంలో ప్రతిపాదిత ఉప ఎన్నికను తన ఎన్నికల పిటిషన్ తేలే వరకు నిర్వహించవద్దని కోరుతూ కాంగ్రెస్ నేత పి. విజయారెడ్డి తెలంగాణ హైకోర్టును ఆశ్రయించారు. గాంధీ భవన్‌లో మీడియాతో మాట్లాడిన ఆమె.. 2023 ఎన్నికల్లో దానం నాగేందర్ విజయాన్ని సవాల్ చేస్తూ తాను ఇప్పటికే ఎన్నికల పిటిషన్ దాఖలు చేశానని తెలిపారు. తన వాదనలకు సంబంధించిన ఆధారాలను కోర్టుకు సమర్పించినట్లు చెప్పారు. దానం నాగేందర్ ఎన్నికను రద్దు చేసి, తనను ఎమ్మెల్యేగా ప్రకటించాలని కోరుతూ కేసు దాఖలు చేసినట్లు వెల్లడించారు. ఇదే సమయంలో పెండింగ్‌లో ఉన్న ఎన్నికల పిటిషన్ పరిష్కారమయ్యే వరకు ఖైరతాబాద్‌లో ఉప ఎన్నికకు నోటిఫికేషన్ ఇవ్వబోమని ఎన్నికల సంఘం తెలంగాణ హైకోర్టుకు తెలిపింది.

మరోవైపు, ఉప ఎన్నికల్లో గెలవలేకపోవడంతోనే ముఖ్యమంత్రి రేవంత్ రెడ్డి తనతో కేసు వేయించారనే ఆరోపణలను విజయారెడ్డి ఖండించారు. ఈ కేసుతో రేవంత్ రెడ్డికి ఎలాంటి సంబంధం లేదని స్పష్టం చేశారు. ఆయన నాయకత్వంలో తెలంగాణలో ప్రజా పాలన కొనసాగుతోందని పేర్కొన్నారు. తాము కేవలం ఎన్నికల కోసం పనిచేసే నాయకులం కాదని, ప్రజల మధ్య ఉంటూ పనిచేసే నాయకులమని అన్నారు. ఒకవేళ ఖైరతాబాద్‌లో ఎన్నికలు జరిగితే ధీటుగా ఎదుర్కొంటామని తెలిపారు. ఖైరతాబాద్ బైపోల్‌పై తుది నిర్ణయం తీసుకునే ముందు ఎన్నికల సంఘం నుంచి అఫిడవిట్ సమర్పించాలని హైకోర్టు ఆదేశించింది.