

వచ్చే ఉత్తరప్రదేశ్ అసెంబ్లీ ఎన్నికల్లో అయోధ్య నుంచి పోటీ చేయాలంటూ సమాజ్వాదీ పార్టీ అధినేత అఖిలేష్ యాదవ్ విసిరిన సవాల్ను ముఖ్యమంత్రి యోగి ఆదిత్యనాథ్ స్వీకరించారు. అయోధ్య నుంచి పోటీ చేసేందుకు తాను సిద్ధంగా ఉన్నానని ప్రకటించిన యోగి.. అఖిలేష్కు దమ్ముంటే అక్కడి నుంచే తనపై పోటీ చేయాలని ప్రతి సవాల్ విసిరారు. అఖిలేష్తో ప్రత్యక్ష ఎన్నికల పోరుకు తాను సిద్ధమని స్పష్టం చేశారు. అయితే, తనను నేరుగా ఎన్నికల్లో ఎదుర్కొనే ధైర్యం అఖిలేష్కు లేదని విమర్శించారు. బలహీనులు ఎప్పుడూ తెరవెనుక నుంచి దాడి చేస్తారని వ్యాఖ్యానించారు. యోగి చేసిన ఈ ప్రకటనతో ఉత్తరప్రదేశ్ రాజకీయాల్లో ఎన్నికల వేడి మరింత పెరిగింది.
గురువారం (నవంబర్ 19) గోరఖ్పూర్ జిల్లాలోని క్యాంపియర్గంజ్లో నిర్వహించిన బహిరంగ సభలో యోగి మాట్లాడుతూ.. గతంలో సమాజ్వాదీ పార్టీ పాలనలో మాఫియా కార్యకలాపాలు, అరాచకాలు, అల్లర్లు, కర్ఫ్యూలు కొనసాగాయని ఆరోపించారు. యువతకు ఉపాధి అవకాశాలు దెబ్బతిన్నాయని, మహిళలు, వ్యాపారుల భద్రతకు ముప్పు ఏర్పడిందని విమర్శించారు. బీజేపీ ప్రభుత్వం నేరస్థులపై కఠిన చర్యలు తీసుకుంటోందని, నేరాలకు పాల్పడేవారిని ఎట్టి పరిస్థితుల్లోనూ ఉపేక్షించబోమని హెచ్చరించారు. బుధవారం (నవంబర్ 18) అఖిలేష్ యాదవ్ రోడ్షో సందర్భంగా గోరఖ్పూర్లో 13 ఏళ్ల బాలుడు మృతి చెందిన ఘటనపై స్పందిస్తూ.. దీనిని విషాదకరమైన ఘటనగా అభివర్ణించారు. బాధిత కుటుంబాన్ని పరామర్శిస్తానని తెలిపారు. వీధుల్లో అశాంతికి కారణమైన వారిని గుర్తించి, బాధ్యులపై కఠిన చర్యలు తీసుకోవాలని అధికారులను ఆదేశించినట్లు వెల్లడించారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!