

రష్యాను, ఆ దేశ ఆధీనంలోని క్రిమియాను కలిపే కీలకమైన కెర్చ్ వంతెనపై ఉక్రెయిన్ మరోసారి దాడి చేసింది. నాలుగు రోజుల వ్యవధిలో ఈ వంతెనపై మూడోసారి దాడి జరగడం గమనార్హం. తాజా దాడితో రష్యా, క్రిమియా మధ్య రైలు రాకపోకలు నిలిచిపోయాయని రష్యా అధికారి ఒకరు వెల్లడించారు. అంతకుముందు జరిగిన రెండు దాడుల కారణంగా రోడ్డు మార్గంలో రాకపోకలు కూడా నిలిచిపోయాయి. అమెరికా అధ్యక్షుడు డొనాల్డ్ ట్రంప్, చైనా అధ్యక్షుడు జిన్పింగ్తో రష్యా అధ్యక్షుడు వ్లాదిమిర్ పుతిన్ సమావేశమైన సమయంలో ఈ దాడులు చోటుచేసుకోవడం అంతర్జాతీయంగా ప్రాధాన్యం సంతరించుకుంది.
ఐరోపాలోనే అత్యంత పొడవైన వంతెనగా పేరొందిన కెర్చ్ బ్రిడ్జిని రష్యా సుమారు రూ.33 వేల కోట్ల వ్యయంతో నిర్మించింది. 19 కిలోమీటర్ల పొడవైన ఈ రోడ్డు, రైలు వంతెన రష్యాలోని తమన్ ద్వీపకల్పాన్ని క్రిమియాలోని కెర్చ్ ద్వీపకల్పంతో కలుపుతుంది. 2018లో రోడ్డు మార్గం, 2019లో రైలు మార్గం అందుబాటులోకి వచ్చాయి. వంతెనపై దాడులకు ప్రతీకారం తీర్చుకుంటామని పుతిన్ హెచ్చరించారు. మరోవైపు, ఉక్రెయిన్ యుద్ధానికి ముగింపు పలికే దిశగా అమెరికా ప్రతినిధులు జారెడ్ కుష్నర్, స్టీవ్ విట్కాఫ్లు బెర్లిన్లో ఉక్రెయిన్ అధ్యక్షుడు జెలెన్స్కీతో చర్చలు జరిపేందుకు సిద్ధమయ్యారు. శాశ్వత శాంతి సాధనకు ఉక్రెయిన్, ఐరోపా దేశాలతో సమన్వయాన్ని బలోపేతం చేయడమే తమ లక్ష్యమని కుష్నర్ వెల్లడించారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!