సీఎం చంద్రబాబుపై వైఎస్‌ జగన్‌ ఫైర్

డీఎస్సీ నియామకాలపై ఆంధ్రప్రదేశ్‌ ముఖ్యమంత్రి చంద్రబాబు నాయుడును ఉద్దేశించి వైఎస్సార్‌సీపీ అధినేత, మాజీ సీఎం వైఎస్‌ జగన్‌మోహన్‌ రెడ్డి తీవ్ర విమర్శలు చేశారు. స్కామ్‌లకు పాల్పడినవారే తమకు తాముగా ఇచ్చుకునే సర్టిఫికెట్లకు విలువ ఏముంటుందని ప్రశ్నించారు. ప్రజాస్వామ్యంలో ప్రతిపక్షానికి ర్యాలీలు నిర్వహించే హక్కు కూడా లేదా అని నిలదీశారు. టీచర్ల ముసుగులో ఉన్నవారితో దాడులు చేయిస్తున్నారని ఆరోపిస్తూ, పోలీసులను అడ్డుపెట్టుకుని స్కామ్‌ను దాచిపెట్టలేరని అన్నారు. ప్రతిపక్షం గొంతును అణచివేసి వాస్తవాలను కప్పిపుచ్చలేరని వ్యాఖ్యానించారు.

డీఎస్సీ నియామకాల్లో జరిగినట్లు తాము ఆరోపిస్తున్న అక్రమాలకు బాధ్యత వహిస్తూ విద్యాశాఖ మంత్రి నారా లోకేశ్‌ రాజీనామా చేయాలని జగన్‌ డిమాండ్‌ చేశారు. నియామకాలపై సీబీఐతో విచారణ జరిపించాలని కోరారు. డీఎస్సీ వ్యవహారంలో అక్రమాలు జరిగాయన్నది వైఎస్‌ జగన్‌ చేసిన ఆరోపణ కాగా, వాటిపై స్వతంత్ర విచారణ జరిపించాలన్నది ఆయన డిమాండ్‌.