ఎన్నికల్లో గెలవలేకే వైకాపా అరాచకాలు.. నాదెండ్ల మనోహర్‌ తీవ్ర విమర్శలు

అన్నమయ్య జిల్లా తంబళ్లపల్లెలో జనసేన పార్టీ కార్యాలయంపై వైకాపా శ్రేణులు దాడి చేయడాన్ని మంత్రి నాదెండ్ల మనోహర్‌ తీవ్రంగా ఖండించారు. ఈ ఘటన హేయమైన చర్య అని పేర్కొన్నారు. కార్యాలయాన్ని ధ్వంసం చేయడంతో పాటు వాహనాలను కూడా ధ్వంసం చేశారని, అడ్డువచ్చిన వారిపై దాడులకు పాల్పడ్డారని ఆరోపించారు. వైకాపా చర్యలను ప్రజాస్వామ్యవాదులంతా ఖండించాలని ఆయన పిలుపునిచ్చారు.

ఎన్నికల్లో గెలిచే సత్తా లేకే వైకాపా ఇలాంటి అరాచకాలకు పాల్పడుతోందని నాదెండ్ల మనోహర్‌ విమర్శించారు. ఎన్నికల సమయంలో రాష్ట్రంలో శాంతిభద్రతల సమస్యను సృష్టించేందుకు వైకాపా ప్రయత్నిస్తోందని ఆరోపించారు. రాజకీయ విభేదాలను ప్రజాస్వామ్యబద్ధంగా పరిష్కరించుకోవాలని, దాడులు, విధ్వంసాలకు పాల్పడటం సరికాదని ఆయన అభిప్రాయపడ్డారు.