వైభవ్ సూర్యవంశీపై ప్రపంచవ్యాప్తంగా క్రేజ్.. రవిశాస్త్రి కీలక సూచన

న్యూజిలాండ్‌లోని ఓ నది ఒడ్డున నడుచుకుంటూ వెళ్తున్న సమయంలో తనకు ఎదురైన ఆసక్తికర అనుభవాన్ని భారత మాజీ కోచ్ రవిశాస్త్రి వెల్లడించారు. కొందరు స్థానిక న్యూజిలాండ్ క్రికెట్ అభిమానులు తన దగ్గరకు వచ్చి, యువ క్రికెటర్ వైభవ్ సూర్యవంశీని ఇప్పటికే చాలా కాలం పాటు బెంచ్‌కే పరిమితం చేశారని, ఇకనైనా అతడికి ప్లేయింగ్ ఎలెవన్‌లో అవకాశం కల్పించాలని కోరినట్లు తెలిపారు. అతి చిన్న వయసులోనే వైభవ్ తన బ్యాటింగ్‌తో ప్రపంచవ్యాప్తంగా క్రికెట్ అభిమానులను ఆకట్టుకుంటున్నాడని ఈ సంఘటన స్పష్టం చేస్తోంది.

వైభవ్ సూర్యవంశీపై పెరుగుతున్న క్రేజ్, అంచనాల నేపథ్యంలో రవిశాస్త్రి టీమిండియా మేనేజ్‌మెంట్‌కు కీలక సూచన చేశారు. వైభవ్ వంటి యువ ప్రతిభావంతుల విషయంలో ఎంతో జాగ్రత్తగా వ్యవహరించాలని అభిప్రాయపడ్డారు. వారిపై అంచనాల ఒత్తిడి పెరగకుండా తగిన మద్దతు అందించాలని, తమ ప్రతిభను నిరూపించుకునేందుకు సరైన అవకాశాలు కల్పించాలని సూచించారు. యువ ఆటగాళ్లను ఒక్కసారిగా పెద్ద బాధ్యతల్లోకి నెట్టకుండా, దశలవారీగా తీర్చిదిద్దడం ఎంతో ముఖ్యమని రవిశాస్త్రి పేర్కొన్నారు.