బిగ్‌బాస్ తెలుగు 10 డే 30: ఐదో వారం నామినేషన్లలో హీటెక్కిన బిగ్‌బాస్‌ హౌస్‌...డేంజర్‌ జోన్‌లోకి అగ్ని పరీక్ష టీం

బిగ్‌బాస్‌ తెలుగు ఇంట్లో ఐదో వారం నామినేషన్‌ ప్రక్రియ తీవ్ర ఉత్కంఠ మధ్య సాగింది. నామినేషన్లు పూర్తయ్యే సరికి అగ్ని పరీక్ష టీమ్‌ మొత్తం డేంజర్‌ జోన్‌లోకి వచ్చింది. తన టీమ్‌లోని అందరూ నామినేషన్లలో ఉంటే, వారిలో ఒకరు ఎలిమినేట్‌ అయ్యే అవకాశం ఉందని రోహిత్‌ ముందుగానే అంచనా వేశాడు. అందుకే సెలెబ్రిటీ గ్యాంగ్‌ నుంచి వీలైనంత ఎక్కువ మందిని నామినేషన్లలోకి తీసుకురావాలని తన టీమ్‌కు సూచించాడు. రోహిత్‌ వ్యూహాన్ని నరేష్‌ కూడా ముందుగానే గుర్తించడంతో సెలెబ్రిటీ టీమ్‌ అతడిని అభినందించింది.

రోహిత్‌ ప్లాన్‌ ప్రకారం అగ్ని పరీక్ష టీమ్‌ సభ్యులు ప్రత్యర్థి టీమ్‌ నుంచి పలువురిని నామినేట్‌ చేశారు. పాయింట్లు ఉన్నా లేకపోయినా నామినేషన్లు చేయడంతో చివరకు కెప్టెన్‌ వర్షిణి, ఇమ్యూనిటీ సాధించిన వంశీ, సుధీర్‌ మినహా మిగతా సభ్యులంతా నామినేషన్‌ జాబితాలోకి వచ్చారు. దీంతో ఈ వారం నామినేషన్‌ ప్రక్రియ మరింత ఆసక్తికరంగా మారింది.

సుధీర్‌ రహిత్‌, షాలినీని నామినేట్‌ చేస్తూ వారు మాటలు జారుతున్నారని, సైగలు చేస్తున్నారని పాయింట్లు చెప్పాడు. రోహిత్‌ ప్రభావం వల్ల షాలినీ గేమ్‌ దెబ్బతింటోందని, రాత్రి ఆలస్యంగా ఇద్దరూ కూర్చొని మాట్లాడుతున్నారని సుధీర్‌ వ్యాఖ్యానించాడు. దీనిపై షాలినీ స్పందిస్తూ అది వ్యక్తిగత విషయం అంటూ సుధీర్‌ను ప్రశ్నించింది. మధ్యలో నవ్వుతున్న సెలెబ్రిటీ టీమ్‌పై కూడా షాలినీ కౌంటర్లు వేయడంతో వాతావరణం వేడెక్కింది. పవర్‌ ఆఫ్‌ పీపుల్స్‌ వీక్‌లో వంశీ కనిపించలేదన్న షాలినీ వ్యాఖ్యలతో మరోసారి మాటల యుద్ధం మొదలైంది. త్రిగుణ్‌ కూడా ఈ వివాదంలో జోక్యం చేసుకోవడంతో గొడవ మరింత ముదిరింది.

ఆ తర్వాత చరణ్‌ ముకేష్‌ను నామినేట్‌ చేస్తూ ఆచితూచి మాట్లాడాలని సూచించాడు. దీనికి ముకేష్‌ వ్యంగ్యంగా స్పందించాడు. అనంతరం అపూర్వ.. ముకేష్‌ చేసిన కొన్ని వ్యాఖ్యలను ప్రస్తావిస్తూ అతడిని నామినేట్‌ చేసింది. ఈ సందర్భంగా “నువ్వు తోపు అయితే నీకు నేను బాపు” అంటూ అపూర్వ వ్యాఖ్యానించగా, “నువ్వు నాకు బాపు? తండ్రివా?” అంటూ ముకేష్‌ కౌంటర్‌ ఇచ్చాడు. దీంతో నామినేషన్‌ ప్రక్రియలో మరోసారి మాటల యుద్ధం చోటుచేసుకుంది.