సూర్యవంశీ కుటుంబం నుంచి మరో క్రికెట్ సంచలనం..

భారత క్రికెట్‌లో సంచలనంగా మారిన వైభవ్ సూర్యవంశీ కుటుంబం నుంచి మరో యువ ప్రతిభ వెలుగులోకి వచ్చింది. వైభవ్ తమ్ముడు ఆశీర్వాద్ సూర్యవంశీ కేవలం 10 ఏళ్ల వయస్సులోనే అద్భుతమైన సెంచరీ సాధించి అందరి దృష్టిని ఆకర్షించాడు. బీహార్‌లోని సమస్తిపూర్‌లో జరిగిన స్థానిక ప్రాక్టీస్ మ్యాచ్‌లో ‘క్రికెట్ అకాడమీ తాత్పూర్’ తరఫున బరిలోకి దిగిన ఆశీర్వాద్ 87 బంతుల్లో 103 పరుగులు చేసి తన బ్యాటింగ్ ప్రతిభను చాటుకున్నాడు. అతడి ఇన్నింగ్స్‌లో 20 ఫోర్లు, ఒక సిక్సర్ ఉండగా, 118.39 స్ట్రైక్‌రేట్‌తో ఆకట్టుకున్నాడు.

ఆశీర్వాద్ ప్రదర్శనపై అన్న వైభవ్ సూర్యవంశీ సోషల్ మీడియా వేదికగా అభినందనలు తెలిపాడు. అతడి స్కోర్‌కార్డు ప్రస్తుతం సోషల్ మీడియాలో వైరల్‌గా మారగా, నెటిజన్లు “అన్నకు తగ్గ తమ్ముడు” అంటూ ప్రశంసలు కురిపిస్తున్నారు. ఇదిలా ఉండగా, వైభవ్ ఇప్పటికే భారత జట్టులో చోటు దక్కించుకుని అతి పిన్న వయస్సులో జాతీయ జట్టుకు ఎంపికైన ఆటగాడిగా గుర్తింపు పొందాడు. ఇటీవల ఐపీఎల్‌లోనూ అద్భుత ప్రదర్శనతో ఆకట్టుకున్న వైభవ్ బాటలోనే ఆశీర్వాద్ కూడా క్రికెట్‌లో పెద్ద స్థాయికి చేరుకుంటాడనే అంచనాలు వ్యక్తమవుతున్నాయి.