ఆసియా క్రీడల్లో భారత్ జోరు..

ఆసియా క్రీడల్లో భారత్ పతకాల వేట కొనసాగుతోంది. కబడ్డీలో పురుషులు, మహిళల జట్లు స్వర్ణ పతకాలు సాధించాయి. పురుషుల ఫైనల్లో ఇరాన్‌ను 40-34తో ఓడించిన భారత్.. తొలి అర్ధభాగంలో 18-17తో స్వల్ప ఆధిక్యంలో నిలిచింది. అనంతరం రైడర్లు, డిఫెండర్ల సమష్టి ప్రదర్శనతో ఆధిక్యాన్ని పెంచుకుని విజయాన్ని సొంతం చేసుకుంది. మహిళల ఫైనల్లోనూ ఇరాన్‌పై భారత్ 37-34తో విజయం సాధించింది. కెప్టెన్ పుష్ప, సంజు దేవి, నిఖిత కీలక పాత్ర పోషించారు. 1990లో కబడ్డీని ఆసియా క్రీడల్లో ప్రవేశపెట్టినప్పటి నుంచి పురుషుల విభాగంలో భారత్ 10 పర్యాయాల్లో తొమ్మిది సార్లు స్వర్ణం సాధించింది. మహిళల విభాగంలో 2010 నుంచి నాలుగు స్వర్ణాలు ఖాతాలో వేసుకుంది.

షూటింగ్‌లో మహిళల 50 మీటర్ల రైఫిల్ 3 పొజిషన్స్ టీమ్ ఈవెంట్‌లో తిలోత్తమ సేన్, విదర్స వినోద్, ఆషీ చౌక్సీతో కూడిన భారత జట్టు రజతం సాధించింది. అథ్లెటిక్స్‌లో 400 మీటర్ల పరుగులో ప్రాచి చౌదరి 53.21 సెకన్లతో కాంస్యం గెలిచింది. మరోవైపు మారథాన్‌లో సావన్ బర్వాల్ 2:11:37 టైమింగ్‌తో రజతం సాధించి సత్తా చాటాడు. తన పేరిట ఉన్న జాతీయ రికార్డును మరోసారి అధిగమించిన సావన్.. 1982 తర్వాత ఆసియా క్రీడల మారథాన్‌లో భారత్‌కు పతకం అందించిన తొలి అథ్లెట్‌గా నిలిచాడు. బ్యాడ్మింటన్‌లో పి.వి. సింధు, ఉన్నతి హుడా మహిళల సింగిల్స్ క్వార్టర్‌ఫైనల్‌కు చేరగా.. గాయత్రి గోపీచంద్-ట్రీసా జాలీ జోడీ మహిళల డబుల్స్‌లో క్వార్టర్స్‌లో అడుగుపెట్టింది. టేబుల్ టెన్నిస్‌లో మానుష్ షా, యశస్విని గోర్పాడే ప్రిక్వార్టర్స్‌లోనే నిష్క్రమించడంతో భారత్ పోరాటం ముగిసింది.