యూఏఈ తరఫున టెస్ట్ క్రికెట్‌లోకి కేఎస్ భరత్ రీఎంట్రీ.. అసలు కారణమిదే!

టీమిండియా మాజీ వికెట్ కీపర్, ఆంధ్రప్రదేశ్‌లోని విశాఖపట్నానికి చెందిన కేఎస్ భరత్ అంతర్జాతీయ టెస్ట్ క్రికెట్‌లోకి తిరిగి రావాలని ప్రయత్నిస్తున్నారు. అయితే ఈసారి భారత జట్టు తరఫున కాకుండా యునైటెడ్ అరబ్ ఎమిరేట్స్ (యూఏఈ) జట్టుకు ప్రాతినిధ్యం వహించాలని భావిస్తున్నారు. 2023-2024 మధ్య భారత టెస్ట్ జట్టులో కొనసాగిన భరత్.. దేశం తరఫున ఏడు టెస్టులు ఆడి, 12 ఇన్నింగ్స్‌లలో 221 పరుగులు చేశారు. వికెట్ కీపర్‌గా 18 క్యాచ్‌లు పట్టడంతో పాటు ఒక స్టంపింగ్ చేశారు.

రిషభ్ పంత్ రోడ్డు ప్రమాదంలో గాయపడటంతో భారత జట్టులో భరత్‌కు అవకాశం లభించింది. అయితే పంత్ తిరిగి జట్టులోకి రావడం, ధ్రువ్ జురెల్‌కు కూడా అవకాశాలు దక్కడంతో భరత్‌కు జట్టులో చోటు పరిమితమైంది. దీంతో విదేశీ క్రికెట్‌లో అవకాశాల కోసం భారత క్రికెట్‌కు వీడ్కోలు పలికారు. ప్రస్తుతం అబుదాబి టీ10 టోర్నీలో పాల్గొనేందుకు యూఏఈలో ఉన్న ఆయన, అక్కడి జట్టు తరఫున టెస్ట్ క్రికెట్ ఆడేందుకు ప్రయత్నిస్తున్నారు. అంతర్జాతీయ క్రికెట్ నిబంధనల ప్రకారం మరో దేశానికి ప్రాతినిధ్యం వహించాలంటే నిర్దిష్ట నిరీక్షణ గడువును పూర్తి చేయాలి. ఈ గడువు వచ్చే ఏడాది ఫిబ్రవరితో ముగియనున్నట్లు సమాచారం. టెస్ట్ క్రికెట్ ఆడటం ఆటగాడికి లభించే గొప్ప అనుభూతుల్లో ఒకటని భరత్ తెలిపారు. తనలో ఇంకా అంతర్జాతీయ క్రికెట్ ఆడే సత్తా, ఆసక్తి ఉన్నాయని భావించి భారత క్రికెట్‌ను వీడాలనే కఠిన నిర్ణయం తీసుకున్నట్లు చెప్పారు. యూఏఈలో కొత్త కెరీర్‌ను ప్రారంభించడంపై ఉత్సాహంగా ఉన్నానని కూడా వెల్లడించారు.