వైభవ్‌ను బెంచ్‌కే పరిమితం చేయడంపై కోచ్ ఆగ్రహం

వైభవ్ సూర్యవంశీ విషయంలో టీమిండియా ప్రధాన కోచ్ గౌతమ్ గంభీర్, జట్టు యాజమాన్యం వ్యవహరిస్తున్న తీరుపై అతడి చిన్ననాటి కోచ్ మనీశ్ ఓఝా తీవ్ర అసంతృప్తి వ్యక్తం చేశాడు. వైభవ్‌ను బెంచ్‌కే పరిమితం చేయడంపై అభ్యంతరం తెలిపాడు. తన అంచనా ప్రకారం వైభవ్ ఒక తుఫానులాంటి ఆటగాడని, అతడిని అడ్డుకోవాలని ప్రయత్నించే వారు ఏదో ఒక రోజు వెనక్కి తగ్గక తప్పదని వ్యాఖ్యానించాడు. ప్రతిభావంతులైన ఆటగాళ్లను బెంచ్‌పై కూర్చోబెట్టడం ద్వారా వారిని తీర్చిదిద్దలేరని అభిప్రాయపడ్డాడు.

భవిష్యత్తులో రాణించేలా యువ ఆటగాళ్లను సిద్ధం చేయాలంటే, వారికి క్లిష్ట పరిస్థితుల్లో ఆడే అవకాశాలు కల్పించాలని మనీశ్ ఓఝా పేర్కొన్నాడు. అయితే, వైభవ్ లాంటి ప్రతిభావంతుడికి తగిన అవకాశాలు ఇవ్వకపోవడం దురదృష్టకరమని అన్నాడు. అతడికి అవకాశం ఇవ్వకూడదనే ఉద్దేశంతోనే ఇలా చేస్తున్నారా అనే సందేహాన్ని వ్యక్తం చేశాడు. వైభవ్ విషయంలో గంభీర్‌తో పాటు జట్టు యాజమాన్యం నిరంకుశంగా వ్యవహరిస్తోందని ఓఝా ఘాటుగా విమర్శించాడు.