ఫిఫా ఉమెన్స్ వరల్డ్ కప్ షెడ్యూల్ రిలీజ్

వచ్చే ఏడాది బ్రెజిల్‌ వేదికగా జరగనున్న ఫిఫా మహిళల ప్రపంచకప్‌ 2027కు సంబంధించిన షెడ్యూల్‌ విడుదలైంది. జూన్‌ 24 నుంచి జూలై 25 వరకు జరగనున్న ఈ మెగా టోర్నీ దక్షిణ అమెరికాలో తొలిసారి నిర్వహించనున్నారు. మొత్తం 32 జట్లు పాల్గొనే ఈ పోటీల్లో 64 మ్యాచ్‌లు జరగనున్నాయి. బ్రెజిల్‌లోని ఎనిమిది నగరాలు ఈ టోర్నీకి ఆతిథ్యం ఇవ్వనున్నాయి.

ఆతిథ్య జట్టు బ్రెజిల్‌ జూన్‌ 24న రియో డి జనీరోలోని మారకానా స్టేడియంలో తొలి మ్యాచ్‌ ఆడనుంది. క్వార్టర్‌ ఫైనల్‌ మ్యాచ్‌లు బెలో హొరిజోంటే, ఫోర్టలేజా, రియో డి జనీరో, సావో పాలో నగరాల్లో జరగనున్నాయి. సెమీఫైనల్స్‌లో ఒకటి సావో పాలోలో, మరోటి మారకానాలో నిర్వహించనున్నారు. జూలై 25న జరిగే ఫైనల్‌కు మారకానా స్టేడియం వేదిక కానుంది.