ఈ సిరీస్‌లో గుర్నూర్‌ బ్రార్‌ కీలకం- మహరూఫ్‌

ఈ నెల 15 నుంచి ప్రారంభమయ్యే టెస్టు సిరీస్‌లో జస్‌ప్రీత్‌ బుమ్రా టీమ్‌ఇండియాకు అందుబాటులో లేకపోవడం పెద్ద లోటేనని శ్రీలంక మాజీ ఆల్‌రౌండర్‌ ఫర్వేజ్‌ మహరూఫ్‌ అభిప్రాయపడ్డాడు. అయితే యువ పేసర్‌ గుర్నూర్‌ బ్రార్‌కు బుమ్రా స్థానాన్ని భర్తీ చేసే సత్తా ఉందని పేర్కొన్నాడు. పాత బంతితో రివర్స్‌ స్వింగ్‌ చేయడంలో బుమ్రాకు ఉన్న నైపుణ్యం అసాధారణమని, అతడి గైర్హాజరీ భారత్‌కు ప్రతికూలమేనని మహరూఫ్‌ తెలిపాడు.

మహమ్మద్‌ సిరాజ్‌ మంచి బౌలరేనని పేర్కొన్న మహరూఫ్‌.. ఈ సిరీస్‌లో గుర్నూర్‌ బ్రార్‌ కీలకంగా మారొచ్చని అన్నాడు. బ్రార్‌ బౌలింగ్‌లో పేస్‌తో పాటు మంచి బౌన్స్‌ కూడా ఉందని, అతడి బంతులను ఎదుర్కోవడం అంత సులభం కాదని చెప్పాడు. సన్నాహక మ్యాచ్‌లోనే అతడి కొన్ని బంతులను ఎదుర్కొనేందుకు బ్యాటర్లు ఇబ్బంది పడ్డారని, కొన్ని బంతులు శరీరానికి బలంగా తగిలాయని పేర్కొన్నాడు. ఈ నేపథ్యంలో గుర్నూర్‌ బ్రార్‌ టీమ్‌ఇండియాకు ప్రమాదకర ఆయుధంగా మారే అవకాశం ఉందని మహరూఫ్‌ అభిప్రాయపడ్డాడు.