రోహిత్‌కు గావస్కర్ స్పెషల్ టార్గెట్..

వెస్టిండీస్‌తో జరిగిన మూడో వన్డేలో రోహిత్ శర్మ 92 పరుగుల వద్ద ఔటై తృటిలో సెంచరీని చేజార్చుకున్నాడు. రోహిత్ మూడంకెల స్కోరును అందుకోకపోవడంపై భారత క్రికెట్ దిగ్గజం సునీల్ గావస్కర్ నిరాశ వ్యక్తం చేశారు. సెంచరీ చేసే అవకాశం వచ్చినప్పుడు దానిని ఎట్టి పరిస్థితుల్లోనూ వదులుకోకూడదని సూచించారు. రోహిత్‌ తన అంతర్జాతీయ కెరీర్‌కు వీడ్కోలు పలికే సమయానికి.. అతడి వయసు కంటే ఎక్కువ సెంచరీలు సాధించాలని గావస్కర్ ప్రత్యేక లక్ష్యాన్ని నిర్దేశించారు. ప్రస్తుతం రోహిత్ ఖాతాలో 35 వన్డే సెంచరీలు ఉన్నాయి. 2027 వన్డే ప్రపంచకప్‌ సమయానికి రోహిత్‌ వయసు 40 ఏళ్లకు చేరనుంది. వెస్టిండీస్‌పై మరో సెంచరీ చేసి ఉంటే ఈ ప్రత్యేక లక్ష్యానికి మరింత చేరువయ్యేవాడని గావస్కర్ అన్నారు.

తన కెరీర్ చివరి దశలో తాను కూడా మరిన్ని టెస్టు సెంచరీలు చేయాలని కోరుకున్నానని గావస్కర్ గుర్తుచేసుకున్నారు. మూడు సార్లు 90ల్లోనే ఔటయ్యానని, ఆ ఇన్నింగ్స్‌లను శతకాలుగా మలిచి ఉంటే.. 38 ఏళ్ల వయసులో రిటైర్ అయిన తనకు సెంచరీల సంఖ్య కూడా అదే స్థాయిలో ఉండేదని చెప్పారు. తాను సాధించలేకపోయిన ఆ ఘనతను రోహిత్ సాధించాలని కోరుకుంటున్నట్లు తెలిపారు. 2023 ప్రపంచకప్‌తో పోలిస్తే ప్రస్తుతం రోహిత్ బ్యాటింగ్ శైలిలో గణనీయమైన మార్పు కనిపిస్తోందని గావస్కర్ ప్రశంసించారు. అప్పట్లో తొలి బంతి నుంచే దూకుడుగా ఆడేందుకు ప్రయత్నించిన రోహిత్.. ఇప్పుడు తన వికెట్ విలువను తెలుసుకుని ఆరంభాలను భారీ స్కోర్లుగా మలుస్తున్నాడన్నారు. 70-80 బంతుల్లోనే సెంచరీ చేస్తే అది జట్టుకు ఎంతో ఉపయోగకరంగా ఉంటుందని, సోషల్ మీడియాలో వచ్చే విమర్శలు రోహిత్‌ను ప్రభావితం చేయకూడదని గావస్కర్ పేర్కొన్నారు.