బాలీవుడ్‌ హీరోగా కోహ్లీ పర్ఫెక్ట్‌ - రాహుల్‌ ద్రవిడ్‌

టీమిండియా మాజీ కెప్టెన్‌, దిగ్గజ క్రికెటర్‌ రాహుల్‌ ద్రవిడ్‌ బాలీవుడ్‌లో నటించే అవకాశం ఉన్న క్రికెటర్‌గా విరాట్‌ కోహ్లీ పేరును ప్రస్తావించారు. ఇటీవల బీబీసీ ఏషియన్‌ నెట్‌వర్క్‌తో జరిగిన సంభాషణలో ద్రవిడ్‌ మాట్లాడుతూ.. కోహ్లీకి ఇతరులను అనుకరించే అద్భుతమైన ప్రతిభ ఉందని ప్రశంసించారు. ఈ నైపుణ్యం నటనలోనూ అతడికి ఉపయోగపడుతుందని అభిప్రాయపడ్డారు.

కోహ్లీ ఇప్పటికే అనేక ప్రకటనల్లో నటిస్తూ కెమెరా ముందు మంచి అనుభవాన్ని సంపాదించుకున్నారని ద్రవిడ్‌ పేర్కొన్నారు. ఈ సందర్భంగా బాలీవుడ్‌ నటి అనుష్క శర్మ కూడా ప్రస్తావనకు రాగా, ఆమె నుంచి కోహ్లీ నటనకు సంబంధించిన సూచనలు పొందవచ్చనే సరదా వ్యాఖ్యలు వినిపించాయి. ఇప్పటివరకు బాలీవుడ్‌ సినిమాలో నటించని కోహ్లీపై ద్రవిడ్‌ వ్యాఖ్యలు ఇప్పుడు ఆసక్తిని పెంచుతున్నాయి.