ఏఐ సేఫ్టీ కోసం కొత్త టెక్నాలజీ..

ఏఐ మోడళ్లు మరింత శక్తిమంతంగా మారుతున్న నేపథ్యంలో వాటి దుర్వినియోగంపై ఆందోళనలు పెరుగుతున్నాయి. ఈ నేపథ్యంలో ఎంటర్‌ప్రైజ్‌, API కస్టమర్ల డేటా గోప్యతను కాపాడుతూనే ఏఐ దుర్వినియోగాన్ని గుర్తించేందుకు OpenAI ‘Private Safety Processing’ అనే కొత్త వ్యవస్థను ప్రివ్యూ చేసింది. వినియోగదారుల అసలు కంటెంట్‌ను OpenAI సిబ్బంది చూడాల్సిన అవసరం లేకుండా, వివిధ ఇంటరాక్షన్లలో ప్రమాదకర కార్యకలాపాలకు సంబంధించిన నమూనాలను ఈ వ్యవస్థ గుర్తిస్తుంది. ఇది ఇప్పటికే ఉన్న Zero Data Retention (ZDR) విధానంపై ఆధారపడి పనిచేస్తుంది.

కొత్త విధానంలో కస్టమర్ డేటాను వారి నియంత్రణలో ఉన్న ఇన్‌ఫ్రాస్ట్రక్చర్‌లోనే ఉంచే అవకాశం ఉంటుంది. అదేవిధంగా, కస్టమర్ నియంత్రణలోని ఎన్‌క్రిప్షన్‌ కీలతో ఎన్‌క్రిప్ట్‌ చేసిన డేటాను OpenAI ఇన్‌ఫ్రాస్ట్రక్చర్‌లో భద్రపరిచే ఆప్షన్‌ను కూడా అందించనుంది. ఏదైనా అనుమానాస్పద కార్యకలాపం గుర్తించినప్పుడు OpenAIకి అసలు కంటెంట్‌ కాకుండా, ఆ కార్యకలాపం స్వభావాన్ని సూచించే పరిమిత సిగ్నల్‌ మాత్రమే అందుతుంది. ప్రస్తుతం ఎంపిక చేసిన కస్టమర్లతో ఈ వ్యవస్థను పరీక్షిస్తున్నారు. సెప్టెంబర్‌లో మరింత విస్తృతంగా అందుబాటులోకి తీసుకురావడంతో పాటు సాంకేతిక వైట్‌పేపర్‌ను విడుదల చేయనున్నట్లు OpenAI తెలిపింది.