పెట్రోల్ వినియోగదారులకు కేంద్రం గుడ్ న్యూస్!

ఇథనాల్ మిశ్రమ పెట్రోల్ వినియోగదారులకు కేంద్ర ప్రభుత్వం కీలక ఉపశమనం కల్పించింది. భారత ప్రమాణాల సంస్థ నిర్దేశించిన నాణ్యత ప్రమాణాలకు అనుగుణంగా ఉండే 22 శాతం నుంచి 30 శాతం వరకు ఇథనాల్ కలిగిన పెట్రోల్‌పై ఎక్సైజ్ సుంకాన్ని పూర్తిగా మినహాయించింది. ఈ నిర్ణయం దేశీయ బయో ఇంధనాల వినియోగాన్ని ప్రోత్సహించడమే లక్ష్యంగా తీసుకుంది.

ముడి చమురు దిగుమతులపై ఆధారపడటాన్ని తగ్గించడం, విదేశీ మారక ద్రవ్యాన్ని ఆదా చేయడం, రైతులకు ప్రయోజనం కల్పించడం వంటి లక్ష్యాలతో ఈ నిర్ణయం తీసుకున్నట్లు ప్రభుత్వం తెలిపింది. ఇథనాల్ ఆధారిత ఇంధనాల వినియోగం పెరగడం ద్వారా భవిష్యత్తులో ఇంధన వ్యయభారం తగ్గే అవకాశం ఉందని భావిస్తున్నారు.

అంతకుముందు కేంద్రం పెట్రోల్, డీజిల్‌పై లీటరుకు ₹10 చొప్పున ఎక్సైజ్ సుంకాన్ని తగ్గించింది. అయితే పశ్చిమాసియా ఉద్రిక్తతల నేపథ్యంలో డీజిల్ ఎగుమతులపై లీటరుకు ₹21.5, విమాన ఇంధన ఎగుమతులపై లీటరుకు ₹29.5 సుంకం విధించింది. మే 15 నుంచి చమురు కంపెనీలు నాలుగు సార్లు ఇంధన ధరలను పెంచగా, అంతర్జాతీయ మార్కెట్లో చమురు ధరలపై అనిశ్చితి కొనసాగుతోంది.