డేటా అవసరం లేని వారికి చౌకైన రీఛార్జ్ ప్లాన్లు

ఇంటర్నెట్‌ డేటా అవసరం లేని మొబైల్‌ వినియోగదారులకు మరింత అనుకూలమైన, తక్కువ ధర రీఛార్జ్‌ ఎంపికలు అందుబాటులోకి వచ్చే అవకాశం ఉంది. భారత టెలికాం నియంత్రణ ప్రాధికార సంస్థ వాయిస్‌, ఎస్‌ఎంఎస్‌ మాత్రమే అందించే ప్లాన్లను అందుబాటులో ఉంచడంపై దృష్టి పెట్టింది. ప్రస్తుతం అమల్లో ఉన్న నిబంధనల ప్రకారం టెలికాం సంస్థలు డేటా లేకుండా కేవలం వాయిస్‌, ఎస్‌ఎంఎస్‌ సేవలు అందించే కనీసం ఒక ప్రత్యేక టారిఫ్‌ వోచర్‌ను అందించాలి. వీటి చెల్లుబాటు గరిష్ఠంగా 365 రోజుల వరకు ఉండొచ్చు. అలాగే తక్కువ కాలవ్యవధి ప్లాన్ల లభ్యత, డేటా తొలగించినప్పుడు ధరను తగిన స్థాయిలో తగ్గిస్తున్నారా అనే అంశాలను కూడా ట్రాయ్‌ పరిశీలిస్తోంది.

ఈ మార్పుల ఉద్దేశం ప్రధానంగా కాల్స్‌, సందేశాల కోసం మాత్రమే మొబైల్‌ కనెక్షన్‌ ఉపయోగించే వృద్ధులు, తక్కువ ఆదాయ వర్గాల వినియోగదారులు, డేటాను తక్కువగా వినియోగించే వారికి ఉపయోగపడటమే. టెలికాం సంస్థలు అందించే అన్ని టారిఫ్‌ ప్లాన్ల వివరాలను కస్టమర్‌ కేర్‌ కేంద్రాలు, రిటైల్‌ దుకాణాలు, వెబ్‌సైట్లు, యాప్‌లలో స్పష్టంగా అందుబాటులో ఉంచాలి. ఇంటర్నెట్‌ డేటా అవసరం లేని వినియోగదారులు తమ అవసరానికి సరిపోయే వాయిస్‌, ఎస్‌ఎంఎస్‌ ప్లాన్‌ను ఎంచుకోవడం ద్వారా ఉపయోగించని డేటా కోసం చెల్లించాల్సిన అవసరాన్ని తగ్గించుకోవచ్చు.