ఈపీఎఫ్‌ఓ వాట్సాప్ ఛానెల్ ఫాలో చేయడం ఎలా?

ఎంప్లాయీస్ ప్రావిడెంట్ ఫండ్ ఆర్గనైజేషన్ (ఈపీఎఫ్‌ఓ) తన సభ్యుల కోసం అధికారిక వాట్సాప్ ఛానెల్‌ను అందుబాటులోకి తీసుకొచ్చింది. యూఏఎన్‌కు రిజిస్టర్ అయిన మొబైల్ నంబర్ ఉన్న సభ్యులు వాట్సాప్ ద్వారా పీఎఫ్ బ్యాలెన్స్, లావాదేవీలు, క్లెయిమ్ స్థితి వంటి వివరాలను ట్రాక్ చేయడంతో పాటు పీఎఫ్ పథకాలు, ముఖ్యమైన ప్రకటనలు, నోటిఫికేషన్లను తెలుసుకోవచ్చు.

వాట్సాప్ ఛానెల్‌లో చేరేందుకు నేరుగా అధికారిక లింక్‌ను ఓపెన్ చేసి ‘Follow’ ఆప్షన్‌ను ఎంచుకోవచ్చు. అలాగే ఈపీఎఫ్‌ఓ అధికారిక సామాజిక మాధ్యమ ఖాతాల్లో అందుబాటులో ఉన్న క్యూఆర్ కోడ్‌ను స్కాన్ చేయడం ద్వారా లేదా వాట్సాప్‌లోని ‘Updates’ ట్యాబ్‌లో ‘Channels > Explore’ విభాగానికి వెళ్లి ‘EPFO’ అని సెర్చ్ చేసి వెరిఫైడ్ ఛానెల్‌ను ఫాలో చేయవచ్చు.

అయితే ఈ వాట్సాప్ ఛానెల్ ప్రధానంగా సమాచారం, అప్‌డేట్లను అందించేందుకు మాత్రమే ఉపయోగపడుతుంది. ఖాతాలోకి లాగిన్ కావడం, పూర్తి పీఎఫ్ వివరాలను చూడటం లేదా డబ్బులు ఉపసంహరించుకోవడం వంటి సేవలను ఛానెల్ ద్వారా నేరుగా పొందలేరు. ఇలాంటి సేవల కోసం అధికారిక ఈపీఎఫ్‌ఓ పోర్టల్ లేదా ఉమాంగ్ యాప్‌ను మాత్రమే ఉపయోగించాలి.

వాట్సాప్ ఛానెల్ లింక్: https://www.whatsapp.com/channel/0029Vb6kmH48Pgs8ftd6Kw3Y.