అమెరికా పర్మ్‌ ప్రోగ్రామ్‌ సస్పెన్షన్‌పై ఇన్ఫోసిస్‌ స్పందన

అమెరికా పర్మ్‌ (PERM) కార్యక్రమం నుంచి తమ సంస్థను సస్పెండ్‌ చేయడంపై ఐటీ దిగ్గజం ఇన్ఫోసిస్‌ స్పందించింది. ఈ నిర్ణయం తమ వ్యాపార కార్యకలాపాలపై గణనీయమైన ప్రభావం చూపదని భావిస్తున్నట్లు వెల్లడించింది. అమెరికాలో సాంకేతికత, ఆవిష్కరణలు, స్థానిక ఉద్యోగుల నియామకాలపై పెట్టుబడులు కొనసాగిస్తున్నామని తెలిపింది. అమెరికాలో అమల్లో ఉన్న చట్టాలు, నిబంధనలకు పూర్తిగా కట్టుబడి ఉన్నట్లు తన రెగ్యులేటరీ ఫైలింగ్‌లో పేర్కొంది.

హెచ్‌-1బీ వీసాలపై పనిచేస్తున్న విదేశీ ఉద్యోగుల కోసం గ్రీన్‌కార్డు దరఖాస్తులకు మార్గం కల్పించే పర్మినెంట్‌ లేబర్‌ సర్టిఫికేషన్‌ (PERM) కార్యక్రమం నుంచి మైక్రోసాఫ్ట్‌, టాటా, ఇన్ఫోసిస్‌, విప్రో సహా ఎనిమిది ప్రముఖ ఐటీ కంపెనీలను అమెరికా సస్పెండ్‌ చేసినట్లు సమాచారం. అయితే, గత కొన్నేళ్లుగా భారత ఐటీ కంపెనీలు గ్రీన్‌కార్డుల కోసం చేసే పర్మ్‌ దరఖాస్తులను గణనీయంగా తగ్గించినట్లు టెక్‌ వర్గాలు చెబుతున్నాయి. అమెరికా ఆర్థిక సంవత్సరం 2026లో టీసీఎస్‌ కేవలం రెండు పర్మ్‌ దరఖాస్తులే సమర్పించడం గమనార్హం.