క్విక్‌ కామర్స్‌పై కర్ణాటక సర్కార్‌ కీలక చర్యలు

క్విక్‌ కామర్స్‌ ప్లాట్‌ఫామ్‌లలో విషపూరిత దతూర (ఉమ్మెత్త) పండ్లు, విత్తనాలను మానవ వినియోగానికి అనువైన ఆహార ఉత్పత్తులుగా విక్రయిస్తున్నట్లు గుర్తించిన కర్ణాటక ఆహార భద్రత, ఔషధ పరిపాలనా విభాగం కీలక చర్యలు తీసుకుంది. అమెజాన్‌, స్విగ్గీ ఇన్‌స్టామార్ట్‌, బిగ్‌బాస్కెట్‌లకు జారీ చేసిన ఫుడ్‌ లైసెన్సులు, రిజిస్ట్రేషన్లను తదుపరి ఉత్తర్వులు వెలువడే వరకు తాత్కాలికంగా నిలిపివేసింది. దతూర ఉత్పత్తుల ఆన్‌లైన్‌ విక్రయంపై ఫిర్యాదులు రావడంతో అధికారులు దర్యాప్తు చేపట్టారు.

దర్యాప్తులో కొన్ని ప్లాట్‌ఫామ్‌లలో దతూర పండ్లు, విత్తనాలను ఆహార ఉత్పత్తులుగా చూపిస్తూ ఎఫ్‌ఎస్‌ఎస్‌ఏఐ లైసెన్స్‌ లేదా రిజిస్ట్రేషన్‌ నంబర్లు కూడా ఉన్నట్లు అధికారులు గుర్తించారు. కొన్ని ప్యాకెట్లను గిడ్డంగుల్లో నిల్వ చేసి ఆన్‌లైన్‌ ఆర్డర్ల ద్వారా విక్రయించేందుకు సిద్ధంగా ఉంచినట్లు తేలింది. ‘థోర్న్‌ యాపిల్‌’గా పిలిచే దతూరలో సహజంగానే విషపూరిత ఆల్కలాయిడ్లు ఉంటాయని, శుద్ధి చేయని దతూరను తీసుకోవడం తీవ్రమైన ఆరోగ్య సమస్యలకు దారితీయవచ్చని అధికారులు హెచ్చరించారు.

సంబంధిత సంస్థలు ఇచ్చిన వివరణలు సంతృప్తికరంగా లేవని ఆహార భద్రతా విభాగం పేర్కొంది. అమెజాన్‌ తన వివరణను సమర్పించలేదని, ఇన్‌స్టామార్ట్‌ అదనపు సమయం కోరిందని అధికారులు తెలిపారు. మరోవైపు బిగ్‌బాస్కెట్‌ దతూర పండ్ల ఆన్‌లైన్‌ విక్రయాన్ని నిలిపివేసినట్లు వెల్లడించింది. దతూరను ఆహారంగా విక్రయిస్తున్న విక్రేతలు, సరఫరాదారుల లైసెన్సులు, రిజిస్ట్రేషన్లను కూడా నిలిపివేయాలని, మానవ వినియోగం కోసం ఉన్న అన్ని ఆన్‌లైన్‌ లిస్టింగ్‌లు, ప్రకటనలను తొలగించాలని ఆదేశించారు.