హోమ్‌ లోన్స్ పై కోటక్‌ బ్యాంక్‌ కొత్త ఆఫర్

గృహ రుణాల ఈఎంఐల విషయంలో రుణగ్రహీతలకు మరింత స్పష్టత, స్థిరత్వం కల్పించే లక్ష్యంతో కోటక్‌ మహీంద్రా బ్యాంక్‌ కొత్త హైబ్రిడ్‌ హోమ్‌ లోన్‌ పథకాన్ని ప్రవేశపెట్టింది. ఈ పథకం కింద 39, 52 లేదా 65 నెలల వరకు వడ్డీ రేటును లాక్‌ చేసుకునే అవకాశం ఉంటుంది. దీంతో లాక్‌-ఇన్‌ వ్యవధిలో రెపో రేటులో మార్పులు వచ్చినప్పటికీ రుణ వాయిదాలపై వాటి ప్రభావం ఉండదని బ్యాంక్‌ తెలిపింది.

ఇటీవలి వడ్డీ రేట్ల ధోరణులను పరిగణనలోకి తీసుకుంటే, రూ.1 కోటి గృహ రుణం తీసుకునే వారికి ఈ పథకం ద్వారా గరిష్ఠంగా రూ.3.46 లక్షల వరకు ఆదా అయ్యే అవకాశం ఉందని బ్యాంక్‌ పేర్కొంది. ప్రస్తుతం కోటక్‌ మహీంద్రా బ్యాంక్‌ గృహ రుణాల వడ్డీ రేట్లు 7.6 శాతం నుంచి ప్రారంభమవుతున్నాయి. రుణం తీసుకున్న తొలి సంవత్సరాల్లో ఈఎంఐల భారం విషయంలో రుణగ్రహీతలకు ఈ పథకం కొంత స్థిరత్వాన్ని అందించనుంది.