భారీగా తగ్గిన వెండి ధరలు

వెండి కొనుగోలుదారులకు కొంత ఊరట లభించింది. గత కొన్ని వారాలుగా తీవ్ర ఒడుదొడుకులకు లోనవుతున్న వెండి ధరలు బుధవారం (నవంబర్ 11) మరోసారి భారీగా తగ్గాయి. మల్టీ కమోడిటీ ఎక్స్ఛేంజ్ (ఎంసీఎక్స్)లో కిలో వెండి ధర దాదాపు రూ.4,700 మేర పడిపోయింది. ఇటీవల ధరల్లో చోటుచేసుకుంటున్న హెచ్చుతగ్గుల కారణంగా కొనుగోలును వాయిదా వేసిన వారికి ఈ తగ్గుదల కొంత ఉపశమనం కలిగించింది.

బుధవారం ఉదయం వెండి ధర కిలోకు రూ.1,82,450 వద్ద ట్రేడయింది. అంతకుముందు ముగింపు ధర రూ.1,87,127గా ఉండగా, ఒక్కరోజులోనే రూ.4,677 తగ్గింది. అంటే దాదాపు 2.5 శాతం పతనమైంది. మరోవైపు, దేశీయ మార్కెట్‌లో కిలో వెండి ధర సుమారు రూ.5,000 తగ్గి రూ.2 లక్షల వద్దకు చేరింది. అంతర్జాతీయ మార్కెట్లలో పరిణామాలు, అమెరికా డాలర్ విలువలో మార్పులు, వడ్డీ రేట్లపై అంచనాలు వెండి ధరలను ప్రభావితం చేస్తున్నాయి.