వాహనాల కొనుగోలుపై కేంద్రం కొత్త రూల్స్

కేంద్ర ప్రభుత్వ కార్యాలయాల్లో వాహనాల కొనుగోలుకు సంబంధించి ఆర్థిక శాఖ కీలక మార్గదర్శకాలను జారీ చేసింది. ఇకపై ప్రభుత్వ అధికారిక అవసరాల కోసం వాహనాలను కొనుగోలు చేసేటప్పుడు ఎలక్ట్రిక్ వాహనాలకు (EVs) మొదటి ప్రాధాన్యం ఇవ్వాలని స్పష్టం చేసింది. కొత్త నిబంధనల ప్రకారం ఎలక్ట్రిక్ వాహనాల కొనుగోలు ధర పరిమితిని రూ.20 లక్షలకు పెంచగా, పెట్రోల్, డీజిల్ వాహనాల ధర పరిమితిని రూ.10 లక్షలుగా కొనసాగించింది. దీంతో ప్రభుత్వ విభాగాలు వాహనాలను ఎంపిక చేసుకునే విధానంలో మార్పులు చోటుచేసుకోనున్నాయి.

వాహనాలను అద్దెకు తీసుకునే సందర్భంలోనూ ఎలక్ట్రిక్ వాహనాలకే ప్రాధాన్యం ఇవ్వాలని ఆర్థిక శాఖ సూచించింది. పర్యావరణ కాలుష్యాన్ని తగ్గించడం, శిలాజ ఇంధనాల వినియోగాన్ని నియంత్రించడం, చమురు దిగుమతులపై దేశం ఆధారపడటాన్ని తగ్గించడం ఈ నిర్ణయం వెనుక ప్రధాన లక్ష్యాలుగా ఉన్నాయి. ప్రభుత్వ రంగంలో ఎలక్ట్రిక్ వాహనాల వినియోగాన్ని ప్రోత్సహించడం ద్వారా దేశంలో స్వచ్ఛమైన రవాణా వ్యవస్థకు మరింత ఊతం లభిస్తుందని భావిస్తున్నారు.