ఎలక్ట్రిక్‌ కారుగా టాటా నానో రీఎంట్రీ?

సామాన్యులకు సైతం సొంత కారు కలను నిజం చేయాలన్న రతన్‌ టాటా ఆలోచన నుంచి పుట్టుకొచ్చిన టాటా నానో మళ్లీ కొత్త రూపంలో మార్కెట్లోకి వచ్చే అవకాశాలు కనిపిస్తున్నాయి. టాటా మోటార్స్‌ ఇండియా డిజైన్‌ హెడ్‌ అజయ్‌ జైన్‌. నానోను ఎలక్ట్రిక్‌ కారుగా తిరిగి తీసుకురావచ్చనే సంకేతాలు ఇచ్చారు. అయితే, దీనిపై కంపెనీ అధికారికంగా ఎలాంటి లాంచ్‌ వివరాలను వెల్లడించలేదు.

టాటా నానో 2009లో భారత మార్కెట్లోకి ప్రవేశించి, సుమారు రూ.లక్ష ప్రారంభ ధరతో ప్రపంచంలోనే అత్యంత చవక కారుగా గుర్తింపు పొందింది. అయితే, ఆశించిన స్థాయిలో ప్రజాదరణ పొందకపోవడంతో కొన్నేళ్ల క్రితం ఈ కారు ఉత్పత్తి, విక్రయాలు నిలిచిపోయాయి. ఇప్పుడు ఎలక్ట్రిక్‌ వాహనాలకు పెరుగుతున్న డిమాండ్‌ నేపథ్యంలో నానోను ఈవీగా తీసుకొస్తే ఈ ఐకానిక్‌ మోడల్‌కు మరో అవకాశం లభించే అవకాశం ఉంది.