ధోని 45వ పుట్టినరోజు వేడుకలు.. నందిగామలో భారీ కటౌట్

మహేంద్ర సింగ్ ధోని 45వ పుట్టినరోజు సందర్భంగా ఆంధ్రప్రదేశ్‌లో అభిమానులు ఘనంగా వేడుకలు నిర్వహించారు. ఎన్టీఆర్ జిల్లాలోని నందిగామ మండలం అంబారుపేట గ్రామంలో మాజీ భారత కెప్టెన్ ధోనికి 77 అడుగుల భారీ కటౌట్‌ను ఏర్పాటు చేశారు. ఈ భారీ కటౌట్ క్రికెట్ అభిమానులను, స్థానిక ప్రజలను విశేషంగా ఆకర్షిస్తోంది. ధోనిపై అభిమానులు చూపిస్తున్న ప్రేమకు ఇది మరో నిదర్శనంగా నిలిచింది.

హైదరాబాద్–విజయవాడ జాతీయ రహదారి పక్కన ఈ భారీ కటౌట్‌ను ఏర్పాటు చేయడంతో ప్రయాణికుల దృష్టిని సైతం ఆకర్షిస్తోంది. ధోని పుట్టినరోజు సందర్భంగా అభిమానులు అక్కడ ప్రత్యేకంగా వేడుకలు నిర్వహించి ఆయనకు శుభాకాంక్షలు తెలియజేశారు. అంతర్జాతీయ క్రికెట్‌కు వీడ్కోలు పలికిన తర్వాత కూడా ధోనిపై అభిమానుల ప్రేమ ఏమాత్రం తగ్గలేదని ఈ వేడుకలు మరోసారి చాటిచెప్పాయి.