అలహాబాద్‌ హైకోర్టు సంచలన తీర్పు

అలహాబాద్‌ హైకోర్టు ఎస్‌బీఐకి కీలక ఆదేశాలు జారీ చేసింది. దివంగత భర్త తీసుకున్న వ్యక్తిగత రుణాన్ని రికవరీ చేసేందుకు వితంతువు ఫిక్స్‌డ్‌ డిపాజిట్‌ నుంచి డెబిట్‌ చేసిన రూ.19,90,693 మొత్తాన్ని తిరిగి చెల్లించాలని ఆదేశించింది. రుణంతో ఆ మహిళకు ప్రత్యక్ష సంబంధం లేదని, ఆమె రుణగ్రహీత, సహ రుణగ్రహీత, హామీదారు, జామీందారు, నష్టపరిహార బాధ్యత వహించే వ్యక్తి లేదా నామినీ కాదని కోర్టు పేర్కొంది.

ఆమె జీత ఖాతాను కూడా ఎస్‌బీఐ నిలిపివేయగా, రిజర్వ్‌ బ్యాంక్‌ జోక్యంతో ఆ నిలుపుదల తొలగించబడింది. అనంతరం చర్చలు కొనసాగుతున్న సమయంలో బ్యాంకు ఆమె ఎఫ్‌డీని నగదుగా మార్చి రూ.19,90,693ను డెబిట్‌ చేసింది. చట్టబద్ధ వారసురాలిగా ఆమెపై బ్యాంకుకు ఏదైనా చట్టబద్ధమైన క్లెయిమ్‌ ఉంటే, చట్ట ప్రకారం చర్యలు తీసుకోవచ్చని కోర్టు స్పష్టం చేసింది. అయితే చట్టబద్ధ ప్రక్రియను అనుసరించకుండా నేరుగా ఖాతా నుంచి డబ్బు తీసుకోవడం సరికాదని పేర్కొంది. మొత్తాన్ని ఎఫ్‌డీ వడ్డీ రేటుతో సహా నాలుగు వారాల్లో తిరిగి చెల్లించాలని, అదనంగా రూ.1 లక్ష పరిహారం చెల్లించాలని ఎస్‌బీఐని ఆదేశించింది.