ఉక్రెయిన్‌ యుద్ధం వేళ.. అమెరికా మాజీ సైనికులకు రష్యా గాలం!

రష్యా-ఉక్రెయిన్‌ యుద్ధం కొనసాగుతున్న నేపథ్యంలో రష్యా సైన్యంలో విదేశీయుల నియామకాలకు సంబంధించిన మరో అంశం వెలుగులోకి వచ్చింది. అంతర్జాతీయ మీడియా కథనం ప్రకారం.. సోషల్‌ మీడియా వేదికల ద్వారా అమెరికా పౌరులను రష్యా దళాల్లో చేరేలా కొందరు ఏజెంట్లు ప్రోత్సహిస్తున్నట్లు ఉక్రెయిన్‌ నిఘా వర్గాలు పేర్కొన్నాయి. సుమారు 18 మంది అమెరికన్లను రష్యా సైన్యంలోకి నియమించినట్లు, వారికి 26,000 డాలర్ల వరకు సంతక బోనస్‌, నెలకు 2,000 డాలర్ల జీతం ఇస్తామని హామీ ఇచ్చినట్లు ఆ కథనం వెల్లడించింది. వీరిలో కొందరు మాజీ సైనికులు ఉన్నట్లు తెలిపింది.

టిక్‌టాక్‌, ఫేస్‌బుక్‌ వంటి వేదికలను ఉపయోగించి పేదలు, అమెరికా వ్యతిరేక భావజాలం ఉన్నవారిని లక్ష్యంగా చేసుకుంటున్నారని ఉక్రెయిన్‌ నిఘా వర్గాలు ఆరోపించినట్లు కథనం పేర్కొంది. రష్యా సైన్యంలో చేరిన కొందరిని యుద్ధంలో ముందువరుసకు పంపడంతో వారు కొద్దికాలానికే ప్రాణాలు కోల్పోయారని తెలిపింది. ఇదిలా ఉండగా.. రష్యా తరఫున పోరాడేందుకు మరో 10,000 మంది ఉత్తరకొరియా సైనికులను పంపేందుకు కిమ్‌ ప్రభుత్వం ప్రయత్నిస్తోందని ఉక్రెయిన్‌ అధ్యక్షుడు వొలోదిమిర్‌ జెలెన్‌స్కీ ఆరోపించారు. రష్యా దళాల తరఫున 135 దేశాలకు చెందిన సుమారు 29,000 మందిని గుర్తించినట్లు ఉక్రెయిన్‌ అధికారులు చెబుతున్నారు.