బంగాళాఖాతంలో మరో వాయుగుండం...ఏపీకి వర్ష సూచన

బంగాళాఖాతం, అండమాన్ సముద్రం పరిసర ప్రాంతాల్లో మరో వాతావరణ వ్యవస్థ ఏర్పడింది. మయన్మార్ సమీపంలో ఏర్పడిన ఈ వ్యవస్థ ఉత్తర వాయవ్య దిశగా కదులుతూ ఈశాన్య బంగాళాఖాతం, బంగ్లాదేశ్ వైపు వెళ్లే అవకాశం ఉందని భారత వాతావరణ శాఖ తెలిపింది. ఇది మరింత బలపడే అవకాశముందని పేర్కొంది. దీని ప్రభావంతో కోస్తాంధ్ర, రాయలసీమలో రాబోయే రోజుల్లో ఉరుములు, మెరుపులతో కూడిన వర్షాలు, బలమైన ఈదురుగాలులు నమోదయ్యే అవకాశం ఉంది.

కోస్తాంధ్ర, రాయలసీమకు సెప్టెంబర్ 30 వరకు బలమైన ఉపరితల గాలులు, ఉరుములు, మెరుపులకు సంబంధించి వాతావరణ శాఖ హెచ్చరికలు జారీ చేసింది. ఇటీవలే బంగాళాఖాతంలో ఏర్పడిన తీవ్ర వాయుగుండం సెప్టెంబర్ 24న కళింగపట్నం సమీపంలో ఉత్తర ఆంధ్రప్రదేశ్, దక్షిణ ఒడిశా తీరాన్ని దాటింది. దాని ప్రభావం కొనసాగుతున్న సమయంలోనే మరో వాతావరణ వ్యవస్థపై వాతావరణ శాఖ అప్రమత్తం చేసింది.