ఏఐ మీడియాకు స్పందించిన ఏపీ సీఎం

‘నువ్వు నాకు నచ్చావ్’ చిత్రంలోని వెంకీ కట్టుకథను ఆధారంగా తీసుకుని, ఏఐ సాయంతో ఒక నెటిజన్ రూపొందించిన క్యూట్ వీడియో సోషల్ మీడియాలో వైరల్‌గా మారింది. ఈ వీడియోలో చిన్నారి ఆర్ణ వైజాగ్ కలెక్టర్‌గా కనిపిస్తూ, సీఎం చంద్రబాబుతో కాన్ఫరెన్స్‌లో పాల్గొంటుంది. అదే సమయంలో బయట వేచి ఉన్న తన తండ్రిని చూసి ఆమె చూపే స్పందన ఎంతో భావోద్వేగంగా, ఆకట్టుకునేలా ఉంటుంది. ఈ సన్నివేశం ప్రేక్షకుల హృదయాలను గెలుచుకుంటూ విపరీతమైన ఆదరణ పొందుతోంది.

ఈ వీడియోకు స్పందించిన సీఎం చంద్రబాబు స్వయంగా దానిని రీ-ట్వీట్ చేస్తూ ప్రశంసలు కురిపించారు. “ఈ వీడియో చూసి నవ్వకుండా ఉండటం అసాధ్యం! నేను అధికారికంగా ఆర్ణకు సపోర్ట్ చేస్తున్నాను” అంటూ ఆయన ట్వీట్ చేశారు. ఏఐ సృజనాత్మకతకు ఇది మంచి ఉదాహరణగా నిలుస్తోందని, ఇలాంటి వినూత్న కంటెంట్ సోషల్ మీడియాలో కొత్త ట్రెండ్‌ను సృష్టిస్తున్నదని నెటిజన్లు అభిప్రాయపడుతున్నారు.