ప్రతి శనివారం బ్యాంకులకు సెలవా? వైరల్‌ నోటిఫికేషన్‌పై కేంద్రం క్లారిటీ

SBI సహా ప్రభుత్వరంగ బ్యాంకులకు ప్రతి శనివారం సెలవు ప్రకటిస్తూ కేంద్ర ప్రభుత్వం గెజిట్‌ నోటిఫికేషన్‌ జారీ చేసిందంటూ సోషల్‌ మీడియాలో వైరల్‌ అవుతున్న ప్రచారాన్ని కేంద్రం ఖండించింది. అలాంటి నోటిఫికేషన్‌ను కేంద్ర ఆర్థిక మంత్రిత్వ శాఖ జారీ చేయలేదని స్పష్టం చేసింది. ప్రస్తుతం ప్రభుత్వరంగ బ్యాంకులకు అమల్లో ఉన్న విధానం ప్రకారం ప్రతి నెల రెండో, నాలుగో శనివారాలు మాత్రమే సెలవు దినాలుగా ఉన్నాయి.

బ్యాంకులకు వారానికి ఐదు రోజుల పనివిధానం అమలు చేయాలనే ఉద్యోగ సంఘాల డిమాండ్‌ నేపథ్యంలో ఈ ప్రచారం తెరపైకి వచ్చింది. యునైటెడ్‌ ఫోరం ఆఫ్‌ బ్యాంక్‌ యూనియన్స్‌ ఈ డిమాండ్‌పై సెప్టెంబర్‌లో సమ్మెకు పిలుపునిచ్చింది. 2015లోనే ప్రభుత్వరంగ బ్యాంకులకు ప్రతి నెల రెండో, నాలుగో శనివారాలను సెలవు దినాలుగా ప్రకటించినట్లు కేంద్ర ఆర్థిక మంత్రిత్వ శాఖ పేర్కొంది. మిగిలిన శనివారాలు సాధారణ పనిదినాలుగానే కొనసాగుతున్నాయి.