బంగాళాఖాతంలో మరో అల్పపీడనం.. ఏపీలో మళ్లీ వర్షాలు కురిసే అవకాశం!

బంగాళాఖాతంలో వాతావరణ పరిస్థితులు మారుతున్న నేపథ్యంలో మరో అల్పపీడనం ఏర్పడే అవకాశాలు కనిపిస్తున్నాయి. ఉత్తర అండమాన్ సముద్రంలో కొనసాగుతున్న ఉపరితల ఆవర్తనం ప్రభావంతో మంగళవారం నాటికి ఆగ్నేయ బంగాళాఖాతంలో అల్పపీడనం ఏర్పడవచ్చని ఆంధ్రప్రదేశ్ రాష్ట్ర విపత్తుల నిర్వహణ సంస్థ వెల్లడించింది. ఈ వాతావరణ వ్యవస్థ ప్రభావంతో ఆంధ్రప్రదేశ్‌తో పాటు పరిసర ప్రాంతాల్లో మరోసారి వర్షాలు కురిసే అవకాశం ఉంది. ముఖ్యంగా తీర ప్రాంతాల్లో వాతావరణ మార్పులు చోటుచేసుకోవచ్చని అంచనా వేస్తున్నారు.

వాతావరణ అంచనాల ప్రకారం, ఈ అల్పపీడనం తదుపరి మూడు నుంచి నాలుగు రోజుల్లో బలపడుతూ పశ్చిమ-వాయువ్య దిశగా కదిలి ఉత్తర తమిళనాడు, దక్షిణ కోస్తాంధ్ర తీరాల వైపు వెళ్లే అవకాశముంది. దీని ప్రభావంతో కోస్తాంధ్ర, రాయలసీమ ప్రాంతాల్లో మోస్తరు నుంచి విస్తారంగా వర్షాలు కురవడంతో పాటు గాలుల వేగం పెరగవచ్చు. అయితే, ఈ వ్యవస్థ వాయుగుండంగా మారుతుందా లేదా అనే అంశంపై వాతావరణ నమూనాలు భిన్నమైన అంచనాలను వెల్లడిస్తున్నాయి. రాబోయే 24 నుంచి 48 గంటల్లో దీనిపై మరింత స్పష్టత వచ్చే అవకాశం ఉంది. తీర ప్రాంత ప్రజలు, ముఖ్యంగా మత్స్యకారులు వాతావరణ శాఖ హెచ్చరికలను గమనిస్తూ అప్రమత్తంగా ఉండాలని అధికారులు సూచిస్తున్నారు.