ఎమ్మెల్సీ ఎన్నికలకు బీఆర్‌ఎస్ కసరత్తు..

తెలంగాణ భవన్‌లో బీఆర్‌ఎస్ వర్కింగ్ ప్రెసిడెంట్ కేటీఆర్, పార్టీ సీనియర్ నేత హరీశ్‌రావు ఆధ్వర్యంలో గ్రాడ్యుయేట్ ఎమ్మెల్సీ ఎన్నికల సన్నద్ధతపై సమావేశం నిర్వహించారు. హైదరాబాద్-రంగారెడ్డి-మహబూబ్‌నగర్ ఉమ్మడి జిల్లాల మాజీ మంత్రులతో ఎన్నికల వ్యూహంపై చర్చించారు. త్వరలో ఎన్నికలు జరగనున్న నేపథ్యంలో ఉమ్మడి జిల్లాల ఎమ్మెల్యేలు, మాజీ ఎమ్మెల్యేలతోనూ సమావేశాలు నిర్వహించి కార్యాచరణ రూపొందించాలని నిర్ణయించారు. తెలంగాణలోని గ్రాడ్యుయేట్ ఎమ్మెల్సీ నియోజకవర్గాల ప్రస్తుత వివరాలు రాష్ట్ర ప్రభుత్వ పోర్టల్‌లో నమోదై ఉన్నాయి.

ఎమ్మెల్సీ ఎన్నికలను ప్రతిష్ఠాత్మకంగా తీసుకుని ఇప్పటి నుంచే పకడ్బందీగా పనిచేయాలని పార్టీ నేతలకు బీఆర్‌ఎస్ నాయకత్వం దిశానిర్దేశం చేసింది. ముఖ్యంగా గ్రాడ్యుయేట్ ఓటర్ల నమోదు వంటి ప్రాథమిక అంశాలపై ప్రత్యేక దృష్టి సారించాలని సూచించింది. ఎన్నికల్లో పార్టీ చేపట్టాల్సిన కార్యాచరణ, ఉమ్మడి జిల్లాల వారీగా రూపొందించాల్సిన ప్రణాళికపై నేతలు చర్చించారు. విద్యార్థులు, నిరుద్యోగులు, ప్రభుత్వ ఉద్యోగులు, గ్రాడ్యుయేట్లలో కాంగ్రెస్ ప్రభుత్వంపై వ్యతిరేకత ఉందన్న అభిప్రాయాన్ని సమావేశంలో నేతలు వ్యక్తం చేశారు. ఈ నేపథ్యంలో ఎన్నికల సన్నద్ధతను మరింత ముమ్మరం చేయాలని నిర్ణయించారు.