ఓటుకు నోటు కేసులో రేవంత్ రెడ్డికి ఊరట!

2015 నాటి ఓటుకు నోటు కేసులో తెలంగాణ ముఖ్యమంత్రి రేవంత్ రెడ్డితో పాటు మరో ముగ్గురికి న్యాయపరమైన ఊరట లభించింది. ఈ కేసుకు సంబంధించి ఈడీ రూ.50 లక్షలను అటాచ్ చేస్తూ తీసుకున్న నిర్ణయాన్ని ధృవీకరించిన ఉత్తర్వులను న్యూఢిల్లీలోని SAFEMA అప్పీలేట్ ట్రిబ్యునల్ రద్దు చేసింది. జస్టిస్ మునీశ్వర్ నాథ్ భండారీ నేతృత్వంలోని ట్రిబ్యునల్ సెప్టెంబర్ 14, 2026న ఈ ఉత్తర్వులు జారీ చేసింది.

2015 ఎమ్మెల్సీ ఎన్నికల సమయంలో లంచం ఇవ్వడానికి ప్రయత్నించారనే ఆరోపణలపై ఏసీబీ నమోదు చేసిన కేసు ఆధారంగా ఈడీ దర్యాప్తు చేపట్టింది. కేసు రికార్డుల ప్రకారం ఏసీబీ స్వాధీనం చేసుకున్న రూ.50 లక్షలు ఇప్పటికే ట్రయల్ కోర్టు కస్టడీలో ఉన్నాయి. దీంతో ఆ నగదును ఎవరైనా తరలించే లేదా ఇతర విధంగా వినియోగించే అవకాశం లేదని ట్రిబ్యునల్ పేర్కొంది. ఈ పరిస్థితుల్లో అదే మొత్తానికి సమానమైన మొత్తాన్ని ఈడీ అటాచ్ చేయడం చట్టపరంగా సమర్థనీయం కాదని స్పష్టం చేస్తూ అటాచ్మెంట్ ధృవీకరణ ఉత్తర్వులను రద్దు చేసింది. ఈ నిర్ణయం అటాచ్మెంట్ అంశానికి సంబంధించినదే తప్ప, క్రిమినల్ కేసులో తుది తీర్పుగా భావించరాదు.