ఎల్‌నినో ప్రభావంపై ముందస్తు కార్యాచరణకు సీఎం ఆదేశాలు

ఎల్‌నినో ప్రభావంతో రానున్న నెలల్లో తాగునీరు, సాగునీరు, వ్యవసాయం, విద్యుత్ రంగాల్లో తీవ్రమైన సమస్యలు తలెత్తే ప్రమాదం ఉందని తెలంగాణ ముఖ్యమంత్రి రేవంత్ రెడ్డి హెచ్చరించారు. ఈ ప్రభావంపై అధికారులతో నిర్వహించిన సమీక్షా సమావేశంలో, ఇప్పటి నుంచి వచ్చే జూన్ వరకు ఎదురయ్యే సవాళ్లను అధిగమించేందుకు సమగ్ర కార్యాచరణ ప్రణాళిక రూపొందించాలని ఆదేశించారు. కొవిడ్ సంక్షోభాన్ని ఎదుర్కొన్న తరహాలోనే ఎల్‌నినో వల్ల తలెత్తే సమస్యలను ముందుగానే అంచనా వేసి, సమన్వయంతో చర్యలు చేపట్టాలని సూచించారు.

అవసరమైతే విద్యుత్ కొనుగోలుకు ప్రభుత్వం ఎంత ఖర్చు చేసేందుకైనా సిద్ధంగా ఉందని సీఎం తెలిపారు. అయితే మార్కెట్‌లో విద్యుత్ లభ్యతపై ఆందోళన వ్యక్తం చేస్తూ, అందుబాటులో ఉన్న విద్యుత్‌ను పొదుపుగా వినియోగించేలా చర్యలు తీసుకోవాలని అధికారులకు సూచించారు. చుక్క నీరు కూడా వృథా కాకుండా చూడాలని, తాగునీరు, సాగునీటి అవసరాలకు అనుగుణంగా ప్రణాళికలు రూపొందించాలని ఆదేశించారు. సినిమా, మీడియా, కళాజాతలు, ఇతర మాధ్యమాల ద్వారా ప్రజల్లో అవగాహన కల్పించి, గ్రామస్థాయి నుంచి రాష్ట్రస్థాయి వరకు నీరు, విద్యుత్ పొదుపులో ప్రజలను భాగస్వాములను చేయాలని స్పష్టం చేశారు.