ప్రజాకవి కాళోజీ నారాయణరావుకు నివాళులర్పించిన సీఎం రేవంత్ రెడ్డి

ప్రజాకవి, పద్మవిభూషణ్ కాళోజీ నారాయణరావు వర్ధంతి సందర్భంగా ముఖ్యమంత్రి రేవంత్ రెడ్డి ఆయనకు ఘనంగా నివాళులర్పించారు. తెలంగాణ ప్రజల జీవన విధానం, ఆకాంక్షలు, ఆవేదనలను తన రచనల ద్వారా ప్రపంచానికి చాటిన గొప్ప కవి కాళోజీ అని కొనియాడారు. సమాజంలోని అన్యాయాలు, అసమానతలకు వ్యతిరేకంగా తన కలంతో పోరాడుతూ ప్రజల్లో సామాజిక చైతన్యాన్ని నింపారని పేర్కొన్నారు.

తెలంగాణ భాష, యాస, సంస్కృతికి తన సాహిత్యం ద్వారా కాళోజీ విశిష్ట గుర్తింపు తీసుకొచ్చారని సీఎం గుర్తుచేశారు. సామాన్య ప్రజల జీవితాలు, వారి సమస్యలు, హక్కులు, ఆత్మగౌరవమే ఆయన రచనలకు ప్రధాన వస్తువులుగా నిలిచాయని తెలిపారు. కాళోజీ సాహిత్యం ప్రజల గొంతుకగా, సామాజిక చైతన్యానికి ప్రతీకగా నిలుస్తుందని, ఆయన ఆశయాలు, ఆలోచనలు భావితరాలకు ఎప్పటికీ మార్గదర్శకంగా ఉంటాయని రేవంత్ రెడ్డి పేర్కొన్నారు.