టీజీఎస్ ఆర్టీసీ బస్సుల్లో కొనసాగుతున్న దసరా రద్దీ...

దసరా పండుగ నేపథ్యంలో తెలంగాణ రాష్ట్ర రోడ్డు రవాణా సంస్థ (టీజీఎస్ ఆర్టీసీ) బస్సుల్లో ప్రయాణికుల రద్దీ కొనసాగుతోంది. తొలి మూడు రోజుల్లోనే సుమారు కోటి 40 లక్షల మంది ప్రయాణాలు చేసినట్లు సంస్థ వెల్లడించింది. పండుగ రద్దీ, అదనపు బస్సుల నిర్వహణపై టీజీఎస్ ఆర్టీసీ ఎండీ వై. నాగిరెడ్డి సోమవారం అధికారులతో జూమ్‌ సమావేశం నిర్వహించారు. ప్రయాణికులకు ఎలాంటి ఇబ్బందులు కలగకుండా బస్సు సర్వీసులను నిరంతరం పర్యవేక్షించాలని సూచించారు. గత ఏడాది దసరా తొలి మూడు రోజుల్లో 922 అదనపు బస్సులను నడపగా, ఈ ఏడాది అక్టోబర్ 9, 10, 11 తేదీల్లో 1,417 ప్రత్యేక బస్సులను అందుబాటులోకి తెచ్చినట్లు సంస్థ తెలిపింది.

మహాలక్ష్మి ఉచిత బస్సు ప్రయాణ పథకం ద్వారా మహిళలకు ఈ దసరా సమయంలో రోజుకు సగటున రూ.13.73 కోట్ల మేర ఆదా అవుతున్నట్లు టీజీఎస్ ఆర్టీసీ వెల్లడించింది. గత ఏడాది ఇదే సమయంలో రోజువారీ ఆదా రూ.13.02 కోట్లుగా నమోదైంది. సొంత ఊళ్లకు వెళ్లే ప్రయాణికుల రద్దీని దృష్టిలో ఉంచుకుని అక్టోబర్ 15, 16, 17 తేదీల్లోనూ అవసరానికి అనుగుణంగా అదనపు బస్సులు నడపాలని ఎండీ ఆదేశించారు. పల్లె వెలుగు, ఎక్స్‌ప్రెస్, సిటీ ఆర్డినరీ, మెట్రో ఎక్స్‌ప్రెస్ బస్సుల్లో మహిళలకు ఉచిత ప్రయాణ సౌకర్యం యథావిధిగా కొనసాగుతుందని తెలిపారు. ముందస్తు రిజర్వేషన్ల కోసం టీజీఎస్ ఆర్టీసీ వెబ్‌సైట్ను సందర్శించవచ్చు. ప్రయాణ వివరాల కోసం 040-69440000, 040-23450033 నంబర్లను సంప్రదించవచ్చు.