ఎల్‌నినో ప్రభావంతో రోగాల ముప్పు - డీహెచ్ రవీందర్ నాయక్

ఎల్‌నినో ప్రభావంతో రాష్ట్రంలో తీవ్ర ఎండలు, నీటి ఎద్దడి ఏర్పడే అవకాశాల నేపథ్యంలో వివిధ రకాల అనారోగ్య సమస్యలు తలెత్తే ప్రమాదం ఉందని తెలంగాణ వైద్య ఆరోగ్య శాఖ హెచ్చరించింది. ఎల్‌నినో పరిస్థితులు, సుదీర్ఘ పొడి వాతావరణాన్ని దృష్టిలో ఉంచుకుని డైరెక్టర్ ఆఫ్ పబ్లిక్ హెల్త్ డాక్టర్ బి. రవీందర్ నాయక్ ప్రత్యేక అడ్వైజరీ విడుదల చేశారు. ఎండల తీవ్రత, నీటి కొరత కారణంగా డీహైడ్రేషన్, వడదెబ్బ, కలుషిత నీటి ద్వారా సంక్రమించే వ్యాధులు, పోషకాహార లోపం, మానసిక ఒత్తిడి పెరిగే ప్రమాదం ఉందని ఆయన పేర్కొన్నారు. ముఖ్యంగా గర్భిణులు, శిశువులు, వృద్ధులు, గుండె సంబంధిత సమస్యలు, అధిక రక్తపోటుతో బాధపడేవారు ఎండ వేడికి గురికాకుండా తగిన జాగ్రత్తలు తీసుకోవాలని సూచించారు.

ఎల్‌నినో పరిస్థితుల వల్ల తలెత్తే అత్యవసర పరిస్థితులను సమర్థంగా ఎదుర్కొనేందుకు ప్రభుత్వం ముందస్తు ఏర్పాట్లు పూర్తి చేసిందని డాక్టర్ రవీందర్ నాయక్ తెలిపారు. రాష్ట్రంలోని అన్ని ప్రభుత్వ ఆసుపత్రుల్లో ప్రత్యేక పడకలు, ఐవీ ఫ్లూయిడ్స్, అవసరమైన అత్యవసర మందులను అందుబాటులో ఉంచినట్లు వెల్లడించారు. క్షేత్రస్థాయిలో ప్రజలకు అవసరమైనప్పుడు తక్షణ సహాయం అందించేందుకు ఏఎన్ఎంలు, ఆశా కార్యకర్తలు, అంగన్‌వాడీ కేంద్రాల వద్ద తగినన్ని ఓఆర్ఎస్ ప్యాకెట్లను సిద్ధంగా ఉంచినట్లు చెప్పారు. ఎండలు, నీటి కొరత వల్ల కలిగే ఆరోగ్య సమస్యలను నివారించేందుకు ప్రజలు అప్రమత్తంగా ఉండాలని, వైద్య ఆరోగ్య శాఖ సూచనలు పాటించాలని కోరారు.