ఫారం-6 దరఖాస్తులపై ఈసీ కీలక స్పష్టత

ఓటరు నమోదుకు సంబంధించి ఫారం-6 దరఖాస్తులపై కేంద్ర ఎన్నికల సంఘం (ECI) కీలక స్పష్టత ఇచ్చింది. ముసాయిదా ఓటర్ల జాబితాలో పేరు లేని వారు కొత్తగా ఓటరు నమోదుకు ఫారం-6 ద్వారా దరఖాస్తు చేసుకోవచ్చని తెలిపింది. ఇప్పటికే ఓటరుగా నమోదై ఉన్నవారు కూడా మరోసారి ఫారం-6 సమర్పించవచ్చని, అలా చేయడం నేరం కాదని స్పష్టం చేసింది. ఈ విషయంపై అన్ని రాష్ట్రాల ప్రధాన ఎన్నికల అధికారులకు (CEOs) ఈసీ లేఖ రాసి, దరఖాస్తుల పరిశీలనలో అనుసరించాల్సిన విధానంపై సూచనలు చేసింది.

దేశవ్యాప్తంగా కొనసాగుతున్న ఓటర్ల జాబితా ప్రత్యేక సమగ్ర సవరణ (SIR) నేపథ్యంలో ఈసీ ఈ వివరణ ఇచ్చింది. ఫారం-6లోని ‘మొదటిసారి ఓటరు’ అనే డిక్లరేషన్ చూసి ఇప్పటికే ఓటరుగా ఉన్నవారు ఆందోళన చెందాల్సిన అవసరం లేదని పేర్కొంది. పాత ఓటర్లు మళ్లీ ఫారం-6 సమర్పించినంత మాత్రాన ప్రజాప్రాతినిధ్య చట్టంలోని సెక్షన్ 31 కింద కేసులు నమోదు చేయవద్దని రాష్ట్రాల ఎన్నికల అధికారులకు సూచించింది. అయితే, దరఖాస్తు చేసుకునే వ్యక్తి పేరు మరో నియోజకవర్గంలోని ఓటర్ల జాబితాలో ఉండకూడదని స్పష్టం చేసింది.