దుబాయిలో బతుకమ్మ వేడుకల పేరిట చందా వసూళ్ల దందా

దుబాయిలో బతుకమ్మ వేడుకల పేరిట చందాల వసూళ్ల వ్యవహారం జోరందుకున్నట్లు సమాచారం. కొందరు తెలంగాణ ప్రవాసీయులు వివిధ సంఘాల ప్రతినిధులమంటూ తెలంగాణకు చెందిన ప్రముఖులను కలిసి బతుకమ్మ వేడుకలకు ఆహ్వానిస్తూ ఆర్థిక సహాయం కోరుతున్నట్లు తెలుస్తోంది. దుబాయిలో ఈ ఏడాది కూడా బతుకమ్మ వేడుకలకు పలు తెలంగాణ ప్రవాస సంఘాలు ఏర్పాట్లు చేస్తున్నాయి.

గతేడాదితో పోలిస్తే ఈసారి చందాల కోసం సంప్రదిస్తున్న వారి సంఖ్య పెరిగినట్లు ప్రచారం జరుగుతోంది. గతేడాది ఒక రాజకీయ వర్గం పేరుతో కార్యక్రమాల్లో పాల్గొన్న కొందరు ఈసారి మరో వర్గం పేరుతో ముందుకు వస్తున్నట్లు ఆరోపణలు ఉన్నాయి. చందాలతో పాటు సంఘాల్లో పదవులు దక్కించుకునేందుకు వర్గాలుగా విడిపోయి ప్రముఖులను కలుస్తున్నట్లు సమాచారం. మరోవైపు హైదరాబాద్‌లోని రాజకీయ నాయకులను కలిసి దుబాయిలో జరిగే బతుకమ్మ వేడుకలకు హాజరుకావాలని ఆహ్వానిస్తూ, కార్యక్రమాలకు సహకరించాలని కోరుతున్నట్లు తెలుస్తోంది.