నల్లసముద్రంలో చమురు ట్యాంకర్‌పై డ్రోన్ దాడి

రష్యా-ఉక్రెయిన్ యుద్ధం నేపథ్యంలో నల్లసముద్రంలో ఓ చమురు ట్యాంకర్‌పై డ్రోన్ దాడి జరిగింది. లైబీరియా జెండాతో ప్రయాణిస్తున్న ‘అఫ్రామాక్స్ రియో’ ట్యాంకర్‌పై మానవరహిత నౌక దాడి చేసినట్లు రష్యా రవాణా మంత్రిత్వ శాఖ వెల్లడించింది. రష్యా ప్రకారం, ఈ ఘటన సోచి తీరానికి సమీపంలో చోటుచేసుకుంది. దాడి అనంతరం నౌకలో మంటలు చెలరేగి, సముద్రంలో చమురు దగ్ధమవడంతో భారీగా నల్లటి పొగ కమ్ముకుంది. ఈ ఘటన సమయంలో ట్యాంకర్‌లో ఉన్న మొత్తం 23 మంది సిబ్బంది భారతీయులేనని, వారందరినీ సురక్షితంగా రక్షించినట్లు అధికారులు తెలిపారు. ఎవరూ గాయపడలేదని వెల్లడించారు.

మంటల తీవ్రత కారణంగా తొలుత సహాయక బృందాలు నౌకకు చేరుకుని మంటలను అదుపు చేయడం కష్టంగా మారింది. పరిస్థితి కొంత అదుపులోకి వచ్చిన తర్వాత అగ్నిమాపక సిబ్బంది చర్యలు చేపట్టారు. ఘటన నేపథ్యంలో సోచి సమీపంలోని సిరియస్ ప్రాంతంలో బీచ్‌లను తాత్కాలికంగా మూసివేసి, గాలి, నీటి నాణ్యతను అధికారులు పర్యవేక్షిస్తున్నారు. నల్లసముద్రంలో వాణిజ్య నౌకలపై దాడుల ముప్పు పెరుగుతున్న నేపథ్యంలో ఈ ఘటన మరోసారి సముద్ర భద్రతపై ఆందోళనలను పెంచింది.