దుబాయ్‌-ఇజ్రాయెల్‌ విమానంలో అత్యవసర పరిస్థితి..

పశ్చిమాసియాలో ఉద్రిక్త పరిస్థితులు కొనసాగుతున్న వేళ దుబాయ్‌ నుంచి టెల్‌ అవీవ్‌కు వెళ్తున్న ఫ్లైదుబాయ్‌ విమానంలో సెప్టెంబర్‌ 30న అత్యవసర పరిస్థితి తలెత్తింది. FZ1073 విమానం గాల్లో ఉండగా తొలుత అంతర్జాతీయ ఎమర్జెన్సీ కోడ్ 7700ను, ఆ తర్వాత 7500 కోడ్‌ను ప్రసారం చేసింది. 7500 కోడ్‌ సాధారణంగా విమానంలో చట్టవిరుద్ధ జోక్యం లేదా హైజాక్‌ అనుమానం ఉన్నప్పుడు ఉపయోగిస్తారు. దీంతో ఇజ్రాయెల్‌ భద్రతా వ్యవస్థ అప్రమత్తమై ఫైటర్‌ జెట్లను రంగంలోకి దించింది.

అనంతరం విమానం తన మార్గాన్ని మార్చుకుని సౌదీ అరేబియాలోని తబుక్‌ విమానాశ్రయంలో సురక్షితంగా ల్యాండ్‌ అయింది. తొలుత హైజాక్‌ అనుమానాలు వ్యక్తమైనప్పటికీ, ఆ తర్వాత అందిన సమాచారం ప్రకారం కాక్‌పిట్‌లో పైలట్ల మధ్య జరిగిన శారీరక ఘర్షణే అత్యవసర పరిస్థితికి కారణమై ఉండొచ్చని అధికారులు భావిస్తున్నారు. హైజాక్‌ జరిగినట్లు ధ్రువీకరణ లేదని ఇజ్రాయెల్‌ అధికారులు తెలిపారు. విమానంలోని ప్రయాణికులు, సిబ్బంది అందరూ సురక్షితంగా ఉన్నట్లు ఫ్లైదుబాయ్‌ వెల్లడించింది. ఘటనపై దర్యాప్తు కొనసాగుతోంది.