దుర్గగుడిలో ఏటీఎం తరహా లడ్డూ విక్రయ యంత్రం..

విజయవాడ ఇంద్రకీలాద్రిపై ఉన్న శ్రీదుర్గామల్లేశ్వర స్వామివార్ల దేవస్థానంలో ప్రయోగాత్మకంగా ఏటీఎం తరహా స్వయంచాలక లడ్డూ విక్రయ యంత్రాన్ని ఏర్పాటు చేశారు. రూ.6 లక్షల వ్యయంతో సెంట్రల్ ఇన్‌ఫర్మేషన్ సెంటర్‌ ప్రాంగణంలో ఏర్పాటు చేసిన ఈ యంత్రాన్ని దేవాదాయ శాఖ కమిషనర్‌ రామచంద్రమోహన్‌, పాలకమండలి ఛైర్మన్‌ రాధాకృష్ణ, ఈవో శీనానాయక్‌ కలిసి ప్రారంభించారు. భక్తులు చరవాణితో క్యూ ఆర్‌ కోడ్‌ను స్కాన్‌ చేసి, తమకు అవసరమైన లడ్డూ బాక్సులను ఎవరి సహాయం లేకుండా పొందవచ్చు. ఈ పైలట్‌ ప్రాజెక్టును పరిశీలించిన అనంతరం ఇతర ప్రధాన దేవాలయాల్లోనూ ఇలాంటి యంత్రాలను ఏర్పాటు చేసే అవకాశం ఉందని అధికారులు తెలిపారు.

ఇదిలా ఉండగా, దుర్గగుడి హుండీల్లో భక్తులు సమర్పించిన కానుకలను 14 రోజుల అనంతరం బుధవారం లెక్కించారు. ఈ లెక్కింపులో రూ.2,08,91,285 నగదు ఆదాయం వచ్చినట్లు దేవస్థానం అధికారులు వెల్లడించారు. అలాగే 203 గ్రాముల బంగారం, 2.674 కిలోల వెండి లభించాయి. విదేశీ కరెన్సీలో 192 అమెరికా డాలర్లు, 400 యూఏఈ దిర్హమ్స్‌, 80 ఇంగ్లాండ్‌ పౌండ్లు, 115 కెనడా డాలర్లు, 20 ఆస్ట్రేలియా డాలర్లు, 151 సౌదీ రియల్స్‌ భక్తులు కానుకలుగా సమర్పించారు.