ఎస్‌ఐఆర్‌పై ఈసీ ప్రకటన అపోహలకు తెరదించింది - చంద్రబాబు

ఓటర్ల జాబితాల ప్రత్యేక సమగ్ర సవరణ (ఎస్‌ఐఆర్‌)పై ప్రధాన ఎన్నికల కమిషనర్‌ జ్ఞానేశ్‌ కుమార్‌, ఎన్నికల కమిషనర్లు ఎస్‌.ఎస్‌. సంధూ, వివేక్‌ జోషి సంయుక్తంగా చేసిన ప్రకటన అపోహలకు తెరదించిందని ఆంధ్రప్రదేశ్‌ ముఖ్యమంత్రి చంద్రబాబు నాయుడు పేర్కొన్నారు. ఈ ప్రకటన రాజ్యాంగ సంస్థల సమగ్రత, విశ్వసనీయతను మరోసారి చాటిచెప్పిందని శనివారం ‘ఎక్స్‌’లో తెలిపారు. ఎస్‌ఐఆర్‌కు సంబంధించిన నిర్ణయాలన్నీ సమష్టిగా, సంస్థాగత నిబంధనలను పాటిస్తూ తీసుకున్నవేనని పేర్కొన్నారు.

ఎన్నికల ఫలితాలు ప్రజాతీర్పును ప్రతిబింబిస్తాయని చంద్రబాబు అన్నారు. బలమైన ప్రజాస్వామ్యంలో గెలుపు, ఓటములను హుందాతనంతో స్వీకరించడం నాయకత్వ లక్షణమని పేర్కొన్నారు. రాజ్యాంగ సంస్థలను గౌరవించడం అత్యంత ముఖ్యమని, దేశ ప్రజాస్వామ్య ప్రక్రియపై ప్రజల విశ్వాసాన్ని నిలబెట్టడం పార్టీలకు అతీతంగా నాయకులందరి ఉమ్మడి బాధ్యత అని స్పష్టం చేశారు. ఎస్‌ఐఆర్‌పై అంతర్గత విభేదాల వార్తల నేపథ్యంలో సెప్టెంబర్‌ 26న ముగ్గురు ఎన్నికల కమిషనర్లు సమావేశమై, ఎస్‌ఐఆర్‌కు సంబంధించిన నిర్ణయాలు ఏకగ్రీవంగా ఆమోదించామని ఈసీ స్పష్టం చేసింది.