రాహుల్‌ పక్కన పరుగెత్తడం నా అదృష్టం.. మహేశ్‌కుమార్‌ గౌడ్‌ ఆసక్తికర వ్యాఖ్యలు

టీపీసీసీ అధ్యక్షుడు మహేశ్‌కుమార్‌ గౌడ్‌ లోక్‌సభలో ప్రతిపక్ష నేత రాహుల్‌ గాంధీతో కలిసి నడవడం, పరుగెత్తడం తనకు ఎంతో సంతోషాన్నిచ్చిందని అన్నారు. భారత్‌ సమిట్‌లో పాల్గొన్న ఆయన మీడియాతో మాట్లాడుతూ.. గిగ్‌ వర్కర్ల ర్యాలీ సందర్భంగా తాను పరుగెత్తిన ఘటనపై వివరణ ఇచ్చారు. తాను ఎక్కిన బైక్‌ స్కిడ్‌ కావడంతో మరో బైక్‌ ఎక్కేందుకు వెనక్కి వెళ్లానని, అనంతరం రాహుల్‌ గాంధీ పిలవడంతో తిరిగి ఆయన వద్దకు పరుగెత్తుకుంటూ వెళ్లానని తెలిపారు. తాను ఫిట్‌గా ఉన్నందుకే అలా పరుగెత్తగలిగానని, దీనిపై ప్రతిపక్షాలు ఎందుకు బాధపడుతున్నాయో అర్థం కావడం లేదని వ్యాఖ్యానించారు. ఈ సందర్భంగా రాహుల్‌తో జాతీయ, అంతర్జాతీయ పరిణామాలపై చర్చించానని, సోనియా గాంధీ పుస్తకంపై ఆయన అభిప్రాయాలను తెలుసుకున్నానని చెప్పారు.

రాహుల్‌ గాంధీకి కుర్తా పైజామా వేసుకుంటే బాగుంటుందని తాను సలహా ఇచ్చినట్లు మహేశ్‌కుమార్‌ గౌడ్‌ వెల్లడించారు. భారత్‌ సమిట్‌ ముగింపు కార్యక్రమంలో రాహుల్‌ అదే దుస్తుల్లో కనిపించడంతో తన సూచనను పాటించారని అన్నారు. సోనియా గాంధీ ఆత్మకథను మరో మూడు నెలల్లో తెలుగులోకి అనువదించనున్నట్లు తెలిపారు. ఆ పుస్తకాన్ని కొనుగోలు చేసి వివిధ పార్టీల నాయకులు, అధికారులు, జర్నలిస్టులకు అందజేస్తానని, కేసీఆర్‌కు కూడా ఒక ప్రతిని ఇస్తానని చెప్పారు. హైదరాబాద్‌ చాయ్‌, బన్‌ మస్కా అంటే రాహుల్‌ గాంధీకి ఇష్టమని, గిగ్‌ వర్కర్ల సమస్యలపై ఆయన ప్రత్యేక శ్రద్ధ చూపుతారని మహేశ్‌కుమార్‌ గౌడ్‌ పేర్కొన్నారు.