ఏపీ, మేఘాలయలో ఎస్‌ఐఆర్‌ గడువు పొడిగింపు..

ఆంధ్రప్రదేశ్‌, మేఘాలయలో ఓటర్ల జాబితా ప్రత్యేక సమగ్ర సవరణ (SIR) ప్రక్రియ గడువును కేంద్ర ఎన్నికల సంఘం పొడిగించింది. ఆంధ్రప్రదేశ్‌లో జులై 31న ప్రారంభమైన నోటీసుల జారీ, క్లెయిమ్‌లు-అభ్యంతరాల పరిష్కార ప్రక్రియ అక్టోబర్‌ 10 వరకు కొనసాగనుంది. తుది ఓటర్ల జాబితాను అక్టోబర్‌ 16న ప్రచురించనున్నారు. న్యూఢిల్లీలోని నిర్వాచన్‌ సదన్‌లో జరిగిన పూర్తి ఎన్నికల సంఘం సమావేశంలో ఈ నిర్ణయం తీసుకున్నారు.

ముఖ్య ఎన్నికల కమిషనర్‌ జ్ఞానేశ్‌ కుమార్‌, ఎన్నికల కమిషనర్లు సుఖ్‌బీర్‌ సింగ్‌ సంధు, వివేక్‌ జోషి ఈ సమావేశానికి హాజరయ్యారు. ఐదు రోజుల్లో పూర్తి ఎన్నికల సంఘం సమావేశం కావడం ఇది రెండోసారి. ఎస్‌ఐఆర్‌ ప్రక్రియలో భాగంగా క్లెయిమ్‌లు, అభ్యంతరాల పరిష్కారానికి మరింత సమయం కల్పించేలా ఈ గడువు పొడిగింపు చేపట్టినట్లు సమాచారం.