ఫేక్ సర్టిఫికెట్ల గుట్టు రట్టు.. ఉద్యోగులపై వేటు!

హైదరాబాద్‌లో ఫేక్ సర్టిఫికెట్ల ఆధారంగా ప్రభుత్వ ఉద్యోగాలు పొందిన వారిపై అధికారులు చర్యలు ప్రారంభించారు. నకిలీ ధ్రువపత్రాలతో 37 మంది ప్రభుత్వ జూనియర్ లెక్చరర్లుగా ఉద్యోగాలు పొందినట్లు గుర్తించారు. ఈ వ్యవహారంపై తెలంగాణ ఇంటర్ బోర్డు సంబంధిత ఉద్యోగులకు షోకాజ్ నోటీసులు జారీ చేసింది.

వారం రోజుల్లోగా నోటీసులకు వివరణ ఇవ్వాలని ఇంటర్ బోర్డు ఆదేశించింది. ఉద్యోగుల సమాధానాలను పరిశీలించిన అనంతరం తదుపరి చర్యలు తీసుకుంటామని అధికారులు స్పష్టం చేశారు. నియామక ప్రక్రియలో పారదర్శకతను కాపాడేందుకు, నకిలీ సర్టిఫికెట్ల వినియోగాన్ని అరికట్టేందుకు ఈ చర్యలు చేపట్టినట్లు తెలిపారు.